樂隊Soler平時愛去大牌檔、茶餐廳，歎港式飲品美食，貪其夠風味。今日兩兄弟齊齊去新進駐銅鑼灣的「香港大牌檔」，一邊飲奶茶、食碗仔翅，一邊說起鍾情的舊事舊物，更對店內的懷舊裝修大表欣賞，話好似時光倒流，開餐時特別過癮。

重現昔日情懷

Soler直言食飯重味道多於環境，但踏進經精心布置的「香港大牌檔」，也落足眼力四圍參觀。餐廳每層各有不同主題，像地下模仿舊式大牌檔，木枱櫈配塑膠吊燈，氣氛輕鬆隨意，大門旁邊還有架人力車，引得兩兄弟即時試坐。沿着樓梯直上一樓，會看到地面鋪滿紙皮石地磚，天花裝上水晶燈，一派冰室格局，卡位更特別放置舊屋邨的窗景：不同公司的招牌、晾衫竹及風箏等，懷舊場景非常逼真。

雖在澳門土生土長，但Soler也對本港文化略知一二，大孖Julio說：「我哋以前經常過來香港玩，後來才正式在此入行發展，所以唔會對人力車、冰室陌生。」住唐樓的細孖Dino則表示：「我哋好鍾意舊事物，覺得依家已經買少見少，值得保留同珍惜。呢間餐廳布置咁有心思，感覺好得意，可以畀機會大家睇番以前。」

Soler繼做音樂會嘉賓、出席慈善活動後，現忙於新國語碟的後期製作，亦趁機寫新歌，進修音樂，努力裝備自己。

一樓布置成懷舊冰室模樣，看鋪滿紙皮石地磚，非常逼真。

中西合璧新作

環境予人驚喜，食物選擇亦層出不窮，絕不限於大牌檔貨色，奶茶咖啡、三文治、小菜及炒粉麵以外，還有泰、越、美式食物，以及大廚創出一系列中西合璧的菜式，包括燴牛尾撈粗麵、斑球燴扁意粉、煙三文魚檬粉配蟹子忌廉汁，款款創意十足。

說到最愛美食，Julio即時話：「我好食得辣，但凡食豉椒肉片炒河定必加指天椒。如果想知間餐廳得唔得，我會叫招牌菜，或自己經常食的，一試就知真章。」Dino試食過後點名大讚三杯雞、大牌檔炒米粉好食：「炒米粉乾身唔多油，可以放心食，三杯雞聞落好香，煮得入味，而且呢間餐廳的意大利粉煮得Al Dente，好正宗。」

大牌檔炒米粉 $36 用上馬來西亞式的秘製醬汁，將米粉、豬肉鬆、豬腩仔肉、蝦肉、雞蛋、韮菜及芽菜等炒香，食落微辣惹味，米粉炒得乾身少油，平凡中見師傅功力。	三杯雞 $42 雞肉同樣以一杯醬油、一杯酒及一杯水炮製，但味道經改良後更勝傳統，為這傳統台灣美食帶來新鮮感。	烚龍脷卷配菠菜薯蓉番茄汁 $49 清新健康的菜式，龍脷卷內有羅勒，面層放有番茄碎，簡單配搭沒搶去魚肉鮮味。
懷舊碗仔翅 $14 湯羹濃稠得宜，放滿以雞湯煨煮的木耳、粉絲、肉絲、冬菇絲及筍絲等，入味得來很足料。	大牌檔紅豆冰 $20 深受食客歡迎的飲品，紅豆煮得軟綿甜膩，夾着面層刨冰，一飲即時透心涼。

撰文：楊淑英

攝影：郭凱敏

髮型：Eddie Wong @II Hair

服裝：Ben Sherman

查詢電話：2838 3318