由Demo下載版到早前PES歐版，等咗成個月先見「Winning Eleven 2010」開賣，網友個個讚上網夠流暢、畫面靚過人，梗係第一時間約香港甲組球隊天水圍飛馬班球員打番鋪！試過先知今集強化比賽模式，仲學FM（Football Manager）玩球隊管理，好似搵贊助、搞轉會、組球迷會，想做油王買起支球隊話咁易。

美斯勁過人球迷好氣氛

很多人話「Winning Eleven 2010」靚過上集好多，盤球扭波動作細膩咗，慢鏡Zoom埋去連皺紋都見到，原來Konami特別搵美斯真人着住電腦特技衫，拍過晒每個控球動作。最重要是電腦AI更加醒目，識得主動補位攔截，並按照戰術調整防線和助攻距離，想大炒對手都幾難；連球迷反應都一齊升呢，在主場會聽到不同的打氣聲和歌聲，客隊掂波則噓聲四起，猶如置身現場咁好氣氛。

用新光影技術做過晒球員容貌，驟眼睇幾位巴塞球星果然靚仔好多，似足真人一樣。	今集入波難咗好多，戰術調配變得相當重要，可設定進攻、防守及補位距離等。	礙於版權問題依然出唔到阿仙奴（遊戲改名North London）等球會，但UEFA歐聯就冇問題。

領隊兼老闆叻過費爵爺

「Winning」出咗十幾年依然咁多粉絲追捧，除了球員真實感和聯賽對戰吸引，更不時引入新元素給玩家驚喜，好似上集追加「Become a Legend」單人模式，就扮演初出茅廬的小子踢到成球壇名星；今集更強化「Master League」模式做領隊兼老闆，唔單止可調配和買賣球員，仲要兼顧訓練和薪金開支，以及搵贊助和球迷會等，用不同方式獲取資金增強球隊實力。

「Become a Legend」自設球員外表國籍等，由預備組踢到甲組，訓練成超級球星。	「Master League」聯賽模式入面要做領隊兼老闆，賺錢買賣球員增強球隊實力。	網友將香港甲組聯賽球隊做晒入上集「Winning」，天水圍飛馬件波衫真係幾似，希望今集快點有Save下載啦。

Winning心得

李靈峰：「前幾代『Winning』都鍾意兩邊側翼快放底線傳中，今集發覺個波比較離腳，更容易被人搶到，惟有用球員技術搭夠，好似揀巴塞用美斯和亨利壓住兩邊強攻，真實感和細緻度比上集更正。」

張健峰：「以前鍾意用尼日利亞屈體力和速度，新一集球員AI好咗好多，冇得咁屈機，相對來說可試到真實戰術。打青年軍時是踢防守型足球，打機將隊形變做5-4-1一齊討論踢法，令思路更清晰。」

李靈峰

張健峰

天水圍飛馬前鋒 李靈峰

外號理大王子，身兼模特兒、理工大學足球隊隊長及飛馬前鋒，頭槌威脅力強。

天水圍飛馬後衞 張健峰

人稱「張峰」的張健峰，司職左後衞，2006年入選香港足球代表隊，助攻力和速度極佳。

遊戲資料

開發商：Konami

平台：PS3、Xbox 360

類型：足球運動

人數：多人連線

日期：已推出

售價：$388

查詢電話：2246 8113

撰文：鍾鎮科

攝影：梁偉德