古巨基加盟英皇推出頭炮大碟《you talkin' to me？》，每次基仔都絞盡腦汁搞新碟主題，面對新世代人人愛講「爛Gag」，基仔撥亂反正用「名言金句」教大家唱出人生道理。

講Gag成為流行潮語，基仔新碟亦緊貼潮流，以大家耳熟兼啜核的金句及電影對白做新碟的歌名。

「地球很危險」

主打歌《地球很危險》是出自周星馳的電影《少林足球》，星爺向趙薇講的經典對白，另一首《沒有腳的小鳥》則是張國榮在電影《阿飛正傳》的浪子宣言，當然少不得天王黎明的金句超爆代表作《空肚食早餐》亦成了基仔必選歌名，他說：「呢個Concept幾好玩，又令人易記得，單聽歌名就夠親切感，吸引到啲人想聽吓歌詞講乜，亦唔會局限咗只唱情情塔塔，有首《周星呢》同《我讀得書少》就係一首勵志歌。」

唔想搞病林夕

基仔今次更掌管監製大權，升呢「一哥」創作變得有自主兼極大自由度：「唔關事，我做嘢都係埋頭苦幹嗰種，以前都試過幫自己做監製，唔係第一次，今次音樂班底搵埋張佳添、健華、伍樂城幫手，上幾次成隻碟都由夕爺（林夕）操刀，搞到佢差啲寫到嘔血，作為朋友兼好夥伴，我唔想逼到佢焦慮症發作，今次畀佢寫半隻碟好啦！」

自從脫離前唱片公司金牌大風，舊公司是非一直未止，人事變動外，傅穎和楊愛瑾相繼離巢，傅穎更鬧出合約糾紛，側田則發生與曹格毆鬥事件，是非沒完沒了。基仔以局外人身份看舊公司是非：「我都有留意啲報道，不過我最關心係以前合作嘅好朋友同台前幕後同事嘅情況，其他就唔會講太多。」

現身份尷尬可有與Paco聯絡？基仔說：「有試過聯絡，佢生日我都有打電話畀佢！（好似有咗隔膜？）冇話隔唔隔膜，我哋識咗咁多年，唔使解釋太多。」

友情永遠不變

很多人認為基仔為事業失友情？他說：「都冇損失過，大家仲喺香港呢個地方，真朋友就算唔同公司友情都可以繼續！」他口中的不變友情相信非側田莫屬，基仔直認不諱：「係呀，冇變過喎！」有指金牌大風將力谷側田做一哥？基仔替老友歡呼：「Yeah，我支持佢架！（不怕兄弟相殘爭飯食？）呢個圈又點止得一碗飯，大家有飯食，有工開，為樂壇做好啲咪仲好玩。」不過，「有得必有失」基仔承認為公司犧牲了「唯一最愛」：「我冇打機好多個月啦，因為好多嘢要做，其實我已經唔敢開新Game打，逼自己玩足球Game，個Game打咗成十年去到登峰造極技術架，估唔到我連唯一娛樂都要暫停。」

祖兒阿Sa一唱一做

基仔未入英皇前早已與容祖兒和蔡卓妍（阿Sa）在舞台及電影上合作，對於祖兒和阿Sa，基仔有讚冇彈。

「我同祖兒合作過音樂會，有祖兒喺度工作氣氛變得好陽光、好開心，但佢又係個工作認真、好勤力嘅女仔。台上試過合作，如果有機會就想同祖兒拍戲，對觀眾同自己相信有一定新鮮感。」

「同阿Sa認識好多年，同佢算係熟，佢都係祖兒嗰種超勤力女仔，但佢身形纖瘦，外表似弱不禁風，其實佢好捱得，佢拍戲幾晚通宵都頂得住，耐力驚人。再同阿Sa合作，今次會揀合唱，自己都好恨有首合唱歌，好似阿Sa同林俊傑首《小酒窩》咁Hit。」

採訪：音樂組

攝影：劉智源

服裝：Agnes b

化妝：Hubie Har （Atelierd'Arris）

髮型：Mark Ip@Hair