為慶祝I.T旗下自家品牌Chocoolate三周年，品牌邀得日本人氣潮牌A Bathing Ape來個交叉合作，推出一系列服飾。早前余文樂為此批限量系列拍攝宣傳照，為隆重其事，老闆兼老友沈嘉偉更借出私伙林寶堅尼作「道具」！
穿上一身潮服的樂仔配上林寶堅尼，感覺型上加型。樂仔笑言：「自己都着開呢兩個牌子，係我哋呢個generation嘅嘢嚟，兩者風格相近，都係smart casual。我覺得A Bathing Ape係一個傳奇，能夠將casual wear做到咁出名，而Chocoolate就係香港嘅一個奇迹，要成功做好一個本地品牌好難。」至於樂仔鍾情的打扮亦不會過分誇張和花巧，他說：「我自己鍾意着恤衫襯牛仔褲，一係着tee，好少着得好誇張。」
重視衣飾細節位
常被指為潮人的樂仔，卻謙稱不覺自己是個時裝人：「我係有興趣，但話好緊貼又唔係，我會知道個trend，亦都鍾意時裝，不過唔係咩都敢着上身，所以我唔敢講自己係一個時裝人，因為要好大膽。我偏向揀啲啱自己嘅嘢，（覺得自己貪唔貪靚？）算架！平時左襯右襯先出得門口，試上身唔啱又換，最快半個鐘出到門口，最耐可以搞個幾鐘。好似我着十條唔同嘅牛仔褲，人哋睇唔會發覺有咩唔同，但我自己會知，可能係條拉鏈，個褲腳位，又或者係啲車線位，我好重視details。」
自比美女戴珠寶
這次拍攝工作有靚衫又有靚車，令愛時裝又愛車的樂仔感到十分美好，他說：「兩樣都係男仔鍾意嘅嘢，着得好靚再配埋部靚車，畫面好完美，就好似女仔着得靚再佩戴啲好靚嘅珠寶一樣。」
大過手癮
拍攝當日，大會在I.T老闆沈嘉偉經常幫襯的車行內，特地搭建出一片白色朱古力作背景的場景，製作認真。沈嘉偉還特地借出私伙林寶堅尼來拍攝宣傳照，此辣跑乃去年款式，型號為LP640，價值約700萬港幣，亦是限量版，難怪樂仔在換場景時幫忙駛走靚車趁機「過手癮」，即使只是慢速兼極短距離，但他已流露一副得意笑容。
文：名人組