鄔君梅（Vivian）十六歲入演藝圈，現年四十二歲的她，事業發展一路平步青雲，早已躋身荷里活，但在她的演藝生命中卻有一個謎，纏繞了她十幾年，直至早前才由關錦鵬為她解開謎團，不過，她知道結果後，卻成為生命中的遺憾，失眠了兩晚，心痛不已。
Vivian現與老公Oscar定居美國洛杉磯，拍戲時就中國、美國兩邊走，既是演員又是製片人，她揚言戲癮十分大，每年必定最少拍一套片。對於中國現在的電影事業，大有百花齊放之感覺，機會多多，不少電影精英都到中國發展。
早前Vivian出席上海電影節，不但見到不少老友，還有來自香港及各國的演藝界猛人，當她見到關錦鵬時，即令她想起一個問題，埋藏在她心裏十幾年，很想知道這個答案。她說：「十多年前，有次見到關錦鵬，佢畀咗一本書我睇，那本書叫《紅玫瑰與白玫瑰》，我當時唔明白乜意思，以為佢想介紹一本好書畀我，睇完之後，我亦無同佢聯絡，之後我留意到佢開拍咗呢套片，搵陳沖做紅玫瑰，葉玉卿做白玫瑰，陳沖還憑着呢套戲拿到金馬獎女主角。」
錯過好戲心痛難眠
Vivian續說：「我喺上海見到關錦鵬時，我不敢問佢點解當時會畀呢本書我睇，後來佢話其實係想我演呢套戲，想我演紅玫瑰呢個角色，就算我要演白玫瑰亦可以，我當時聽完個心痛到不得了，覺得係我生命中嘅一個遺憾，之後失眠咗兩晚。我當年真係好唔懂事、好內向，好後悔錯過呢個機會。依家睇番，點解我同阿關都咁含蓄，要用暗示嘅方式，唔係直接表達，阿關即時安慰我，佢話我哋依然繼續做呢行，大家仲有機會合作。」
16歲出道戲勢勁
鄔君梅，1967年出生於上海，母親是知名演員朱曼芳。16歲在黃蜀芹執導的影片《青春萬歲》中演出，後留學及移居美國，被意大利導演貝托魯奇看中，扮演電影《末代皇帝——溥儀》中溥儀（尊龍）的年輕勇敢王妃文繡，贏得意大利電影節最佳女配角提名，為她在國際影壇打下基礎。
1993年她接拍導演Oscar Luis Costo的電視電影《消失的兒女》結緣，兩人撻着戀情，1996年12月結婚。多年來她接拍多部電影，包括《忍者龜III》、《喜福會》、《天與地》、《龍在中國》、《鐵與絲》、《枕邊禁書》、《宋家皇朝》、《美人依歸》、《上海紅美麗》、《桃花運》等等。
做長青樹演到70歲
Vivian可能事業太過順風順水，廿歲出頭，因拍《末代皇帝——溥儀》，被提名意大利電影節最佳女配角，又曾被《People》雜誌選為「全球最美麗人士」之一。Vivian廿五歲就打入荷里活，當年是繼陳沖之後，受矚目的一位華裔荷里活女星，樣樣事來得太快，令她無所適從，她說：「當時在外國有好多活動，邀請我去行紅地氈，但我覺得呢啲太出風頭唔去，我好驚，自己刻意低調了十年，我唔想人覺得我是『流星』，意思是瞬間即逝，我好鍾意演戲，我要做到七十歲，我要做演藝圈嘅『長青樹』。」
內地女星好有個性
現時內地女星在國際上都頗有名氣，例如章子怡、周迅、趙薇，她如何看這些後輩？Vivian說：「每一個演員都很有個性，佢哋比我更會安排自己、更成熟，我比佢哋天真，佢哋嘅潛質發揮得好好。但依家啲演員都幾辛苦，一出嚟就一大班人跟住，少咗自己嘅空間，以前我哋有戲上，要做宣傳先見報，依家好似無時無刻都要見報，咁太辛苦啦。（好多時係公司安排？）做藝人如果識保護自己好重要，要『自尊』、『自愛』，條路係自己揀，如果你唔鍾意做嘅嘢，係無人可以逼到你。」
欣賞張國立馮小剛
Vivian早前接拍《建國大業》，再次演繹宋美齡一角，與一班重量級演員合作，雖然這部戲拍了四個月，而且在不少城巿拍攝，但能與有分量的演員合作，感到十分開心，當中更十分欣賞張國立，她說：「佢好勤力，好似一個民工，完全無架子，拍攝期間得閒就拿起掃把拖地，好鍾意佢，睇到佢對片場嘅熱愛。我亦好欣賞馮小剛，為人好真，好踏實的做自己，係一個好榜樣。」
後記:夫妻同心 努力造人
鄔君梅是事業型女性，但同樣着重家庭，與編劇兼導演的老公Oscar結婚多年，兩人在事業上並肩同行，她是老公的靈感泉源，她說：「我老公好鍾意中國文化，成日話我畀到好多靈感佢，我哋最大嘅嗜好係一齊睇戲，跟住一齊討論，喺呢方面佢教識我好多嘢，教我從另一個角度去睇戲，令我更了解一套戲嘅拍攝，係我嘅良師益友。」
至於會否想生小朋友，她坦白說：「呢方面就如劉嘉玲說，早就同老天爺遞咗申請表，我哋本來想二人世界一路避（孕），但近年好努力，如果老天爺未能安排給我，一切順其自然，起碼依家仲好享受同老公的二人世界。」
採訪：Jessica Lam
攝影：吳文聰
場地：SR Gallery