自小苦練一手好鋼琴的徐子淇，因體驗過為考琴而失去彈琴的真正樂趣，故現在對女兒採取開放態度，不會強迫女兒學琴外，更認為學音樂不一定要天分，笑言自己小時候由「八音不全」又甩拍，經慢慢學習後變為今天「八音都全」。
由張王幼倫創立以推廣音樂教育為目標的「Music First慈善行動」昨日於香港理工大學舉行慈善音樂會，晚上更於The Mira舉行38圍盛大晚宴。昨日身為籌委會主席的張王幼倫偕同夫婿張力正，以及副主席李家誠及太太徐子淇率先在The Mira會見傳媒。身穿Roberto Cavalli斜肩、腰間有開窿設計的長裙的子淇，佩戴名貴首飾，分外明艷照人。在旁的李家誠稱太太不會表演豎琴，但不忘讚太太音樂天分比自己高。
13歲考鋼琴八級
子淇受訪時，談到女兒的音樂天分時說：「佢幾有音樂天分，興趣係要慢慢培養，香港好多家長都會逼小朋友為考級而學琴，我十三歲已經考到八級，為考琴而練考試歌，冇機會彈到自己鍾意嘅歌。依家就多啲同個女一齊彈，會彈番鍾意嘅歌。所以我唔會逼個女考級，佢鍾意學就學。」子淇續說平日都會彈兒歌給女兒聽，更希望可以「母女檔」上陣彈豎琴。對於老公大讚她音樂天分高，她說：「每樣嘢唔好只睇有冇天分而學，好似我細個時八音不全同拍子唔準，學吓學吓依家『八音都全』。」
一家四口齊游泳
子淇又笑言因穿上長裙故有錯覺比以前消瘦，李家誠則力讚太太說：「依家最啱，不過都驚佢太瘦，要佢食多啲嘢。」笑問李家誠自己需否減磅，子淇即搶着說：「你哋唔覺佢瘦咗咩？佢靠做運動瘦咗喎，不過係為健康，唔係為瘦人。」他們更說平時一家四口會齊齊游水做運動：「囡囡要用水泡，唔敢放個頭落水。佢無乜運動天分，音樂天分高啲。」是次晚宴場地布置為Colin Cowie負責，以劍橋大學作概念，布置成劍橋校園的花園外，牆身更是以圖書館為主題布滿書架。
文：名人組