應屆出爐香港小姐冠軍劉倩婷、亞軍李姿敏及季軍熊穎詩日前接受本報專訪。由參選至今，有關劉倩婷的「斷背」報道從無間斷，她在專訪中親自剖析，認為戀愛有自由，喜歡男或女也無不可。

劉倩婷自當選以來是非愈揭愈多，最惹人談論莫過於其性取向。繼被踢爆有兩位富貴同性密友Tracy Tong和Kitty Chan，參選期間又被指向「戰友」馬詠恩大獻殷勤。

唔覺有女追求

參選以來，劉倩婷多次否認「斷背」，一直強調喜歡男性，自稱現時沒有拍拖的她說：「以前喺香港係讀女校，去到英國寄宿都係讀女校，直到中六先轉番男女校，所以身邊朋友係女仔多。的確有唔少女性朋友喜歡中性打扮，但係我又唔覺得佢哋有意追求我喎。同埋我覺得戀愛有自由，無論佢哋係鍾意男仔定女仔都當佢哋係朋友。」劉倩婷又稱與馬詠恩第一次面試時已認識，又因大家參選號碼鄰近，故很快熟稔。她倆不會因斷背傳聞而尷尬，因為已知大家的性取向。

除了被指斷背外，不斷有人報料指劉倩婷貪圖富貴，朋友愈識愈有「米」。劉倩婷對此解釋：「交朋友無分貴賤，有冇錢唔係交朋友嘅條件，同埋我自己屋企都衣食無憂，唔會求呢啲嘢。身邊朋友富有都係喺寄宿學校時識嘅。」

壓力大冇懊惱

除了是非不絕外，劉倩婷當選後發表的「MJ論」更成網民箭靶，需即時公開道歉。她說：「身份唔同咗，係多咗好多責任，嗰次講MJ係無心之失。」面對巨大壓力，劉倩婷依然撐得住未覺懊惱：「參選之前就做好心理準備，咁耐以嚟都冇為新聞喊過，向來自己都唔眼淺。」

當選後，與劉倩婷接觸最多的莫過於李姿敏和熊穎詩，她們皆指劉倩婷沒有斷背。李姿敏說：「我自己都係讀女校嘅，所以好明白劉倩婷嘅情況，我唔覺得佢斷背。」熊穎詩亦表示不會因傳聞而對劉倩婷有所避忌：「我哋反而成日會用斷背呢樣嘢嚟講笑，如果一齊擺呢啲甫士又會畀人話，大家都得啖笑。」

李姿敏：冇新聞係好新聞

李姿敏參選時的見報率與劉倩婷相比實在是小巫見大巫，難怪奪亞軍已被視為爆冷。她說：「我得一單咁大把，嗰陣見親其他佳麗報道都係負面，都驚有新聞關於自己，冇新聞就係好新聞。」

熊穎詩：有唇毛都好正常

被封為「鬚根舒淇」的熊穎詩對稱號並不介懷，她說：「我都係睇番相之後先知，喺外國都唔係冇打扮，每日返工返學化好晒妝。其實唇毛都好正常，以前又冇試過畀人笑喎，初初外間咁大反應都有啲驚。」

英語溝通聽唔明

劉倩婷、李姿敏和熊穎詩均於外國長大及讀書，平日以英語交談，沒料到竟出現「語言障礙」。劉倩婷笑說：「因為我係喺英國讀書，講嘅係英式口音，而佢哋講嘅係美國口音，最初有啲地方大家都唔係好明，但係依家大家都適應咗。」

性格不同 互補長短

今屆冠軍劉倩婷個子的骰，與身材高挑的李姿敏和熊穎詩拍照時，明顯出現一個「凹」字，三女拍攝時要靠甫士互相遷就。她們的性格亦各有千秋，劉倩婷被認為最有領導才能，果然是冠軍級人馬。李姿敏則性格開朗，有她的地方都充滿笑聲。而熊穎詩較為淡定，在三人中間有「鎮靜劑」的作用。

文:影視組