名模樂基兒（Gaile）一直高調與天王黎明（Leon）相戀，令向來低調處理感情事的Leon變得開放，Gaile敢愛敢恨，不介意公開向老公說「我愛你」，還自認是「煮飯婆」，日日為愛郎下廚！

前晚Gaile出席Samsung LED顯示屏揭幕活動，大型顯示屏設在維港商業大廈外，客人可自訂甜蜜句子贈愛人。身穿短裙的Gaile全程心情靚爆，對於老公黎明的問題有問必答。問到可有愛的宣言送給Leon？Gaile想了想甜笑說：「I love him！（仲有冇呀？）一時間諗唔到。（咁佢有冇同你講情話？）佢就少講啲！」

情歌聽唔明

記者笑問她可有聽老公的情歌？Gaile續說：「佢哋啲歌歌詞聽唔明，我連報紙都睇唔明。」問到中秋可會與老公人月兩團圓？她笑說：「都想見到，不過未知，（會唔會食月餅賞月？）會食少少，我都好鍾意玩燈籠，因為細個冇機會玩。」她還笑言中秋節是開心節日，所以會放縱吃月餅。

樂基兒自爆日日為老公下廚。

黎明有工作在身，樂基兒希望中秋能人月兩團圓齊慶祝。（資料圖片）

魚翅都識煮

全程冧爆的Gaile還自爆日日為老公下廚，她表示：「中秋節如果唔使工作都會下廚，不過其實日日都係我煮，都冇乜分別。」Gaile還自認廚藝了得，甚至連中菜也難不倒她，她說：「我連魚翅都識煮，（咁Leon鍾意食乜？）佢冇乜所謂，都唔一定要食貴嘢！」

採訪：名人組