06/09/2009

播放本新聞相關短片

譚詠麟足料囝囝初獻藝

入行三十六年的譚詠麟(阿倫)在溫拿時代風靡萬千少女,其十四歲兒子譚曉風亦遺傳父親優良的音樂細胞,阿倫大爆曉風喜歡天馬行空創作歌曲,亦不諱言會揀選愛兒作品收錄自己唱片內,實行子作父唱!

被喻為樂壇「譚校長」的阿倫,十四年前和紅顏知己Wendy生下兒子譚曉風,轉眼間已就讀中學的曉風,早前被周刊拍得獨個兒上學的生活,高大俊朗的曉風跟阿倫年輕時十分酷似,雖然性格較為文靜,但曉風無論運動和音樂都獲得父親遺傳,難怪阿倫亦笑言:「落足料㗎!」

父子同愛運動

雖然阿倫在傳媒面前不欲多談兒子,但每次阿倫都會不經意「露」口風,提起兒子的他亦不禁眉飛色舞,阿倫更踢爆兒子兩歲便看溫拿演出,他說:「佢兩歲就睇溫拿表演,陳友一放低支鼓棍,佢就貪得意走埋去學打鼓!」阿倫喜歡踢足球,兒子曉風則深愛打籃球,兩父子一樣既愛音樂又熱愛運動。

身為籃球校隊的曉風,音樂方面最愛彈結他、彈鋼琴和打鼓,阿倫指兒子閒時喜歡寫歌,但全都是天馬行空,問阿倫曉風可有寫歌給自己?他說:「冇,佢都係玩吓啫!」有機會親自獻唱曉風寫給自己的歌?阿倫說:「唔知,好難講,佢淨係聽外國歌,寫嘅都係英文歌,全部都係天馬行空!」雖然一方面斷然拒絕,但阿倫想了想後又笑笑口說:「下一隻碟先啦……(開心?)都開心嘅!」

自爆管教嚴厲

早前愛兒被周刊跟蹤偷拍,阿倫表示兒子得悉被偷拍顯得很不開心,因為曉風愛低調,他又言:「佢好唔鍾意出街畀人指指點點!」曉風天生高大英俊,問到兒子現時可有拍拖?阿倫笑言:「仲未有來歷不明嘅電話打嚟,我管得好嚴!」

另外,阿倫新碟《再度感動》找來不少圈中音樂人合作,包括太極樂隊的鄧建明(Joey),阿倫指今次二人合作令Joey夢想成真,他表示:「平時同Joey見面都係踢波多,嗰日佢喺錄音室嘅態度好唔同!」原來Joey作了首歌《高低一起》給阿倫,但阿倫嫌音樂太複雜而兩度拒要,阿倫表示:「Joey話溫拿係佢前輩,我係佢偶像,所以好畀心機作咗首歌畀我,但我唔要啲音樂太複雜,改到第三次我先滿意,所以佢覺得我唱佢首歌令到佢夢想成真!」

唔避忌享天倫

阿倫「收埋」曉風多年,但紙始終包不住火,隨着阿倫多次被拍得和Wendy及曉風一家三口出國旅遊,雖然阿倫每次都是低調回應,但並沒作出否認,足見曉風經已逐漸「浮面」!

00年 阿倫和年僅五歲的小曉風同遊公園,之後父子再到跑馬地歎茶。

01年 阿倫攜六歲的小曉風與Wendy到北海道享受家庭樂,雖然阿倫與曉風及Wendy前後腳現身機場,但仍被記者發現。

09年 兒子14歲生日,阿倫和兒子及友人結伴到數碼港欣賞電影,阿倫一見記者即笑晒口:「咁都畀你哋影到!」但因坐正第一行,阿倫悶到瞌眼瞓。

採訪:音樂組

攝影:馬永堅

場地:麗悅酒店 @ The Nooch Bar