雖然炎夏進入最後倒數，但天氣仍然得個熱字，平均氣溫30度以上，要中暑很容易。有人選擇出海避暑，只是玩意離不開Wakeboard、香蕉船或水上電單車，年年如是，就算幾好玩都覺得悶。今次帶大家踩入南丫島西沙水上活動中心，激試另類水上玩意，大部分都需要瞓晒身，刺激度爆燈！

高低難度任擇

提供水上活動，大家必會想起西沙水上活動中心。中心位於南丫島模達灣，由香港仔出發毋須半小時，而且水清沙幼，沙灘環境又夠寧靜，保證三五知己玩得Private又夠癲！跟以往一樣，這裏提供各類型水上玩意，低難度的有碰碰船、電動浮板、水上三輪車等；較刺激的則有三角飛氈、水上薄餅及Wakeboard等，全部以快艇拖着滑行，相當刺激。呢度還有一個特色，就是水退時沙灘極之淺水，有大量海上小動物可捉，唔玩水摸吓蜆都夠過癮！

度假屋食巨型漢堡

玩完水上活動一身散晒，當然要食番夠本補充體力。西沙水上活動中心旁有全模達灣唯一一間西餐廳星浪餐廳，不但面向大海景色宜人，裝潢仲極有地中海風情。雖然食物離不開熱狗、漢堡包同薯條等老外風味，但味道不錯；拍攝當日老闆就拿出一個巨型漢堡包， 一啖咬下肉汁「咇」晒出嚟，勁Juicy！

餐廳亦與水上活動中心合作推出食玩套餐，顧客於星期一至四可以特價$120，或五、六及日以$150，即可享用一客美式套餐加1小時水上活動。不過上述活動太新，並非全列入套餐內，有興趣請先致電中心查詢。

水上碰碰船 成人專用

以往碰碰船由於體積所限，只為3~12歲小朋友而設，今夏中心終於引入成人版，體積加大，兩個大人都坐得落。玩法相當簡單，只要透過左右兩方手絞即可令船身推前。

刺激度︰★（5★滿分）

體能要求︰★★

收費︰$50/30分鐘

電動浮板 小心反艇

裝上摩打的電動浮板，不費吹灰之力就能水上飄，畀你扮「浮游生物」優哉悠哉。若想刺激點，板面亦配置了操控桿，加速、煞掣、掟彎都十足十水上電單車。教練話電動浮板講求平衡力，而且愈輕就愈易浮，男士玩好易反艇。

刺激度︰★★

體能要求︰★

收費︰$50/30分鐘

水上三輪 招搖過市

水上三輪車屬零難度玩意，只要坐在上面向前或向後踏即可推動。雖然外形低B趣致，但在水上航行仍有一定速度，而且紅紅綠綠引人注目，玩累了可坐在此抖一抖！

刺激度︰★★

體能要求︰★★★

收費︰$50/30分鐘

收費︰$80/60分鐘

水上單車 人肉後波

即人力發動雙體船，易於平衡，唔識踩單車都可輕輕鬆鬆四圍「踩場」。最抵死是設有後波，遇到障礙物只要搏命向後踩即可掟彎，惟要留意單車需較大力才能發動，體能差啲都玩唔到！

刺激度︰★★★

體能要求︰★★★★

收費︰$100/15分鐘

水上飛碟 逆風彈起

由美國最新引入，又名「Spitfire 3」，顧名思義可讓3個玩家躺臥其上，再以快艇拖着極速滑行。由於飛碟輕身，所以速度甚快、難度甚高，掟個靚彎保證落水。若遇逆風加上高速，飛碟更會整個彈離水面，想唔變落湯雞都唔得！

刺激度︰★★★★★

體能要求︰★★★★

收費︰$800/1小時

三角飛氈 水上飄移

若閣下自問膽識過人，又喜歡新潮玩意，就不能不玩三角飛氈。玩時只需站在一塊猶如雙人床褥的大「氈」上，手裏拿着連接快艇的粗繩，當快艇開動，即會拖着你在水面「飛馳」。飛氈最多可讓5個人同時站立，逆風時更會整張離開水面，享受集體飄移的快感。

刺激度︰★★★★

體能要求︰★★★

收費︰$800/1小時

點去模達灣？

街渡︰由香港仔乘搭街渡往索罟灣，中途會停模達灣。船程約23分鐘，平日費用$9.2，假日收費$13.8。

上船位置︰香港仔海濱公園內「珍寶海鮮舫」接駁船碼頭隔鄰

班次︰6:40am~10:50pm，星期一至六每60~90分鐘一班；星期日及公眾假期每45~60分鐘一班。

西沙水上活動中心

地址︰南丫島模達灣海灘

電話︰2792 8307

網址︰www.sai-sha.com

撰文︰陳志滔

攝影︰林資凱

模特兒︰Sarena Li（Angel Cast）、Cherie、Orni（Joint Hill）