「金麟豈是池中物，一遇風雲便化龍。」聽到呢句就知聶風和步驚雲再現江湖，不過《風雲Ⅱ》套戲要12月先上，想率先體驗排雲掌、風神腿、摩訶無量威力，大可試玩《風雲II》新系列12吋電影Figure，單睇造型九成九似足鄭伊健，連任達華（絕無神）和謝霆鋒（絕心）新角色都勁似真人，肯定男女粉絲通吃。

多款配件 籌備半年

今次由傾談設計到造型，足足花了半年時間製作，更專程搵韓國頭雕師花幾個月雕製，難怪除了外形比上集穩重外，連眼神都變得銳利，就算盔甲服飾如金屬紋理、破爛披風都一絲不苟，單係步驚雲手掌就有5款供更換，想出排雲掌、拎絕世好劍或擺甫士都很方便。

雖然郭富城個鼻和對眼都唔係咁似，但勝在服飾配件搭夠。	12吋聶風個樣似足鄭伊健，唔講仲以為係真人擺甫士。	單睇步驚雲就有5款手掌替換，方便出排雲掌或拎絕世好劍。
謝霆鋒演得似唔似絕心尚未知，但隻Figure就勁似佢。

神秘造型 聶風無名

據生產商Enterbay表示現時已有過千人預訂，反應比預期熱烈，尤以步驚雲和聶風最受歡迎，預計首批要12月初才正式交貨，稍後還會加推「入魔」版聶風和師傅無名，兩款將以神秘造型登場，唔知會唔會做埋阿Sa等女主角呢？密切留意！

最難雕就係任達華飾演的絕無神，連盔甲紋理都做得超仔細。

另備珍藏刀劍兵器套裝，當中有齊絕世好劍、雪飲刀和火麟劍等。

撰文：鍾鎮科　攝影：張群生　查詢電話：5109 0054