大學生活素有三寶：O Camp、上莊、天地堂，時值8月尾，甚麼「大O」、「細O」都已玩過，要上莊的亦應籌備得如火如荼，如今各Freshmen要迎接的，就是那種「返八半、放六半，中間Break 5個鐘」的「天地堂」生涯。唔想「吉時」就此Hea過，大可善用時間傾Project、傾莊務，甚至增值自己；以下一班老鬼推介心水「Hea場」，有得食又有得玩，包保唔會Hea到散！

由朝傾到晚 樓上Cafe最好玩

回想小記當年讀U，齋讀書唔上莊唔搞Function，三年大學就此Hea過，想來也覺懊悔。可幸見到一班大專戲劇節籌委會的莊員個個熱心又團結，籌辦來年3月的大專戲劇節滙演，總算是大學生榜樣。「莊員來自不同院校，各有各忙，要夾時間開會真係好難，所以『大莊』（聯校委員會）通常在夜晚開會，而『細莊』（各自院校的劇社）就會在天地堂之間坐埋傾；地點通常都會選在Cafe，貪佢哋開得夜，感覺Relax，傾得興起嘈啲都唔會有人鬧。」大專戲劇節籌委會的主席，就讀浸大的阿Dor笑說。

餐廳TC2共分兩層，地下特意預留高樓底空間，驟眼看更似蘇豪的精緻小餐廳。

TC2老闆之一岑仔（左）畢業於中大新聞系，曾為傳媒工作者，他稱最想透過Cafe與現今大學生增進文化交流。

藝術空間Hea住欣賞

各大專院校都設有飯堂，又有得食又有得Hea，本來是捱過天地堂的好地方，可是部分Canteen唔爭氣，食物質素參差，故此街外Cafe就成為啱傾偈又啱Hea的場地。但身為大學生，Hea都應該Hea得型啲嘅！TC2就是阿Dor和莊員們的心水之選。

位於砵蘭街的TC2，老實說，氣氛跟附近店舖格格不入，因為它既是Cafe，更是一個文化分享的場地。老闆Teresa和岑仔都是新聞系出身又做過傳媒，一身文化氣息，連帶Cafe都以知識、文化和藝術行頭。餐廳分為兩層，一樓像個私人Gallery，歡迎顧客將相片、畫作等擺放在此供人欣賞，又常提供場地舉辦試映會、書會甚至小型音樂會等，因此成為不少傳媒、藝術及知識分子駐紮的場地。

4至6人分量的拼盤，分別有Nachos、薯角、餃子雞翼及蜜糖芝士腸，對準年輕人口胃。	（前） New York Cheese Cake $38、（後）青蘋果椰果特飲 $38（a） 各款甜品由老闆娘Teresa親自研製，芝士蛋糕質感夠Rich又不太甜，實為上佳之選。	芝士火腿釀雞胸肉 $108（晚餐包前菜、餐湯、主菜及飲品）（a） 食物在質素和賣相各方面，都可媲美中上級西餐廳，亦於Cafe界中脫穎而出。

浮誇梳化坐得夠格

香港的Cafe開到成行成市，有文化之選當然亦有時尚之選，標榜華麗造型的Cafe首選Pancake Colours。該店最早於銅鑼灣開業，最近於旺角開設分店，更以時興的Bling Bling裝潢作招徠；老闆Kalan更特意從荷蘭、法國等地搜羅特色座椅置於餐廳內，形成強烈風格，部分椅子更是全港獨有。值得一讚的是，餐廳為了配合學生們傾Project、上網Research的需要，特意在地下設置插頭，方便手提電腦的用家，而食物餐牌上亦貼心地標示各食物的製作速度及味道等，一目了然。

Pancake Colours以椅子、吊燈和Bling Bling牆壁裝飾，營造歐陸皇室氣氛。	以仿蛇皮製造的「花生椅」，餐廳負責人表示乃全港獨有，坐在椅上面對面跟朋友傾偈，會有回音效果！	香煎珍寶帶子配意式海鮮燴飯 $89 （b） 餐廳菜式一味靠「大」，珍寶帶子大得有點令人驚訝，意式燴飯味濃可口，大胃王必吃。
白朱古力碎配朱古力咖啡沙冰 $32（b） 沙冰細滑而Mocha香濃，配上白朱古力碎增添口感，消暑良伴。	Beckham $57（b） Cocktail款式算大路，這杯「碧咸」內有百利甜酒、伏特加、焦糖及朱古力，配上朱古力雪糕，甜美可口。	珍寶巨型生日班戟 $188（b） 人人生日食蛋糕，餐廳則設計生日班戟，面層舖上各式雜果，當然是為了切合餐廳名稱。

明星「老 鬼」推介校Can

儘管大學生都往外覓食，但我們總不能對校內Canteen唔公平，且看於香港各大學畢業的藝人們，又有甚麼推介？

梁慧恩（理工大學物理治療系畢業）：位於泳池附近的舊Can，是我當年的蒲點之一，最鍾意食入面嘅雲南米線！我唔太食得辣，但呢個雲南米線酸菜較多，酸咪咪的好開胃，尤其喺冬天嘅時候食番碗，成個人都暖晒！

高皓正（中大哲學系畢業）：中大每間學院都有自己嘅Canteen，但水準真係好參差，不過如果你問10個中大人，10個都一定會答你醫學院Canteen的檸檬批係最好食，好食到唔係中大人都知！Canteen嘅老闆仲好好人添！

撰文：陳嘉勵

攝影：盧展程、譚建章、陳世昌

模特兒：Jackie （Hill Production）

查詢電話：（a） 2388 9772、（b） 2380 0438