郭富城與舒淇因拍戲傳出緋聞，緋聞女友熊黛林（Lynn）不但沒有呷醋，還大方讚舒淇在片場照顧城城十分好人。而城城曾以四個「冇」字否認上述緋聞，Lynn認為這樣對舒淇是好的，不會影響她拍拖或者被人追。

Lynn、Amanda S.和Mandy Lieu等昨日齊齊為Mulberry 09秋冬時裝騷擔任模特兒，演繹最新系列。

Mandy Lieu行騷示範新裝，騷白滑玉背。

Amanda S.感受過台灣打風的威力。

直認冇乜好呷醋

談到城城最近與舒淇因拍戲傳緋聞，到Lynn說：「冇咩信唔信，我係女仔我都鍾意佢（城城）。（即係你鍾意佢啦？）可以鍾意好多人，我都鍾意好多人㗎，唔鍾意都唔可以做朋友。（城城連續講咗四個冇字否認緋聞，係咪向你派定心丸？）咁對個女仔都好，唔會阻住人拍拖同畀人追。（公開戀情咪唔會傳緋聞囉，對你又公平啲。）依家好公平呀，幾好吖。（城城同你解釋咗？）我唔知，係記者問我先知。」她認為並非緊要事，她更沒有呷醋。

有傳舒淇在片場對城城很照顧，Lynn大讚舒淇人好，識照顧人，問她對城城可有信心？Lynn說：「唔係信心唔信心嘅問題，做嘢之嘛。」

裝肚搞到腰骨歪

正忙於拍《葉問2》的她，要扮演身懷六甲的媽媽，裝大肚更弄至腰骨痛：「好辛苦，件衫好難着，唔可以彎腰，搞到條腰骨歪咗，我去睇醫生，話我腰骨有四個地方歪咗，佢同我扭時拍一聲，好驚。」她說是小事一樁，毋須向人撒嬌，亦冇人知她傷了。

Mandy與身為台灣人的男友陳柏霖對台灣水災感到十分心痛，目前柏霖身在大陸拍戲，未能抽空到台灣賑災，Mandy說：「好彩佢屋企人喺台北都平安，喺台南嘅公公婆婆亦冇事，我有為災民祈禱，我哋九月會一齊返台灣，探望公公婆婆。」另外，Amanda S.亦說台灣的家人在水災中沒受影響，她憶及細時遇上颱風，都會感到很害怕。

文：名人組