「Halo 3」打足兩年，都係時候搞吓新意思，6月美國E3展公布嘅新作「Halo 3: ODST」話咁快已經開發完成，遊戲製作人Curtis Creamer更帶埋新作由美國飛來香港同本地玩家見面。「ODST」可以話係「Halo 3」嘅前傳，不過焦點就集中在特種空降部隊ODST身上，當然唔少得3幅新多人模式地圖同玩到停唔到手嘅「Firefight」4人合作模式，好玩！
撰文：布偉倫 攝影：陳世昌
係人係敵一眼睇晒
「ODST」開發團隊今趟巡遊亞洲宣傳遊戲，由韓國、台灣打到香港，既由遊戲首席製作人Curtis Creamer親身示範遊戲嘅新賣點，市場總監Chad Hodge仲乘機推銷即將在下年於Xbox Live推出嘅動畫版《Halo Legends》；動畫由多間日本著名動畫公司製作，絕對唔講得笑。至於「Halo 3: ODST」，故事發生在「Halo 3」之前，不過主線就放喺特種空降部隊ODST之上，透過唔同兵仔嘅視點去組織番成個故事，當然最終目的都係打倒星盟，睇落更有新鮮感。遊戲設計某程度上係填補番第2集同第3集之間嘅隙縫，所以可以用Pistol，又有第二集嘅地圖。今集仲新增特別嘅敵人視覺模式，喺漆黑環境下一樣好容易分到同伴同敵人，抵讚。
Firefight打到唔停手
「ODST」網絡模式有新嘢玩，除咗有正常嘅多人連線模式外，今集最特別係加入「Firefight」4人合作模式。4人會同時扮演ODST成員不斷殲滅敵人，團隊間有一定嘅生命數目，死晒就Game Over；如果有命捱得到，遊戲難度會隨時間不斷增加，而生命數目亦會提升，只要各隊員都有番咁上下水準，呢個連線模式可以有排玩，齊齊加分開啟成就；不過如果有隊員跟唔上，就會連累大家，記住帶眼揀人。如果想喺「Firefight」模式內用特別嘅角色，就記住要喺9月16日前預訂遊戲兼買指定Xbox 360配件，到時就送埋特別角色下載卡同MS Point，對Hardcore機迷嚟講都幾實用。
3大新版圖
「Halo 3: ODST」包含咗總共24個地圖，新地圖就有3個，每個都有各自嘅特色，幾有新鮮感。
Hardcore女機迷：「Halo 3」打得夠激
點睇嬌滴滴嘅Kali都唔似機迷，但原來佢來歷都幾夠照，仲有能力打低大部分港男，當日就有份上台拍住製作人介紹「Halo 3: ODST」。Kali覺得「Halo 3」比同類射擊遊戲要求較高，又要邊跳邊射，但就較刺激；而日練夜練之下（每日玩3~4個鐘）將視野敏感度設定到「10」（最高）都唔會暈兼轉身即可Head Shot，小記甘拜下風。
專 長：射擊遊戲
打機年資：10年以上（射擊遊戲則為2年多）
資 歷：本港「GOW2」比賽亞軍、2,000場以上線上對戰紀錄、線上「殺人」數目逾46,000人
遊戲資料
類 型：射擊
開 發：Bungie
平 台：Xbox 360
推出日期：9月22日
售 價：$309
查詢電話：800 964 215