有鬼才導演之稱的昆頓塔倫天奴，在新戲《希魔撞正殺人狂》再次發揮其血腥創作本色，以表現納粹德軍在二次大戰時的暴行，就連擔演女主角的德國女星戴安古格亦被感染，恨不得親手將希特拉殺死！

記＝記者　戴＝戴安古格　昆＝昆頓塔倫天奴

記：戴安，可介紹吓你喺《希》嘅角色嗎？

戴：我飾演德國四十年代一位有名演員，但真正身份係英國間諜，幫助外國同盟對付納粹德軍。

記：身為德國人，點睇呢段歷史？

戴：冇錯，納粹德國的確有過一段黑暗時代，所有人都唔會忘記，當提到納粹黨，大家即時想起德國，不過過咗咁耐，我哋呢代同下一代都再冇受到呢段戰爭嘅影響，所以我仍會為身為德國人而感驕傲。

享受熱鬧

記：有否恨意呢？

戴：呢件係歷史事實，亦係所有德國人嘅影子，就算我哋唔講，其他人都會經常「提醒」我哋！如果可以嘅話，我哋（德國人）都想親手將希特拉殺死，所以當我知道《希》片開拍，感覺就似「好！一齊將希特拉搞掂啦！」

記：點睇今次同昆頓嘅合作？

戴：真係好享受拍呢部戲，因為有七成演員係來自法國同德國，片場日日都好熱鬧，好似拍緊歐洲電影咁。昆頓出名要求每個演員100%適合先會用，而且我相信佢係最後一位唔理票房收唔收得嘅荷里活大導演，真係好佩服佢！

懶理票房

記：昆頓，戴安話你拍戲唔睇票房成績喎！

昆：哈！其實我拍戲真係唔係為打入荷里活，係為咗全世界人而拍。我自細由媽媽獨力湊大，一直以佢為榜樣，成長過程亦畀我好多啟發。

記：點解今次會拍二次大戰納粹黨嘅電影呢？

昆：首先德國方面唔會有人拍，而靈感係來自七十年代電影《Inglourious Bastards》，雖然新片戲名只有一個字母之別，但其實兩部戲係完全唔同，《希》係從舊片中衍生出新故事。

記：你由名作《標殺令》到依家《希》，都非常賣弄血腥暴力，甚至令人覺得係鼓吹復仇訊息？

昆：我唔係鼓吹復仇，復仇概念絕對唔係你殺死我隻狗，我就殺番你隻狗咁簡單，就以我做例，要對電影工業復仇，最好嘅方法就係拍部大收特收嘅片，令曾經睇唔起我嘅人跌眼鏡吧！

康城影帝捧畢佬上天

就如戴安所說，昆頓向來對於選角非常執着，他為了說服畢彼特參演《希》，去年在畢佬陪女友安祖蓮娜祖莉生產時，特地飛往法國尼斯游說對方，又選來奧地利資深演員基斯杜化華爾茲飾演一角，而基斯杜化早前更憑此片贏得康城影帝寶座。

基斯杜化接受訪問時，就大讚畢佬是真正的演員，半紅不黑的影星應多加向畢佬學習。演戲卅年的他還分享揣摩角色的心得：「好多人都話方法演技，我嘅哲學就係好好讀熟劇本，再用自己認知嘅方法去演繹。」

章怡英國直擊