經常中、港、台三地飛的吳佩慈（Pace），直言天生愛美，對愛情也同樣着緊，與男友Peter蜜運年多的她，大數二人甜蜜點滴，雖然如此，但事業心重的Pace卻表示暫無結婚計劃。
Pace早前專程來港參觀全亞洲首間Parfums Christian Dior全新美妍專門店時，笑言自己天生愛美，故除堅持要護膚外，更有不少研究，並即場解開護膚謬誤，她說：「好多人都以為上機敷mask係最好，其實艙內濕度得2.5，咁乾會抽走晒啲水分。反而平時臨瞓敷mask，搭長途機搽厚啲面霜就得，好似Dior嘅Hydra Life水活力嫩肌系列就可以加強水分同彈性。」
趁轉機急撐枱腳
對美，對愛情，Pace也一樣精明，因為她跟男友Peter各有如日中天的事業，要談情就要分秒必爭。她說：「我哋相處好講時間質素，我呢個女朋友真係畀唔夠時間佢，有時一個月見得一次，所以冇時間鬧交，哈哈！」Pace談到最深刻的一餐飯，是有次兩人剛好要在香港轉機，惟有趁短短一小時，在禁區的餐廳享用叉燒飯，她笑說：「有時早一個月前就約好，佢會特登嚟台灣同我食一餐晚飯，食完佢就走。」
Pace首次跟非台灣人拍拖，卻想不到竟是拍拖最耐的一次：「大家都一齊成年幾，之前我拍親都係半年就散。朋友同家人都好錫我，我嘅生命真係full of love，所以之前搵男友無乜心機，一遇到好煩就會想快啲分手！但係同Peter就好唔同，天南地北，政治、經濟咩都講，共同興趣又係食。」
自認理性少麻煩
自責無時間分予男友的Pace，也是一個理性的女友：「我從來唔會同男友吵架，佢都好鍾意我呢點，佢好忙時我唔想畀麻煩佢，唔會令佢擔心。」Pace又自爆最有趣是父母見過Peter後，也沒有給予評價：「因為佢哋永遠認為全世界冇一個男人可以襯到我，佢哋真係好錫我。」
Pace表示現時無任何結婚計劃，只因要用多些時間去想對方是否自己的終身伴侶：「要睇係咪對到一世外，兩夫妻不但係love couple，更加要係了解自己嘅soul mate。」
遺憾……
Pace自言人生遺憾有很多，其中是未能圓大學夢：「真係好後悔無讀完大學就入娛圈，就算之前再讀番，但真係太忙兼顧唔到，好多相士都話我係可以讀到碩士博士嘅命。讀唔夠書，生命真係會失去好多機會，或者兩年後搵夠會讀中醫。」
採訪：Winnie Choi
攝影：劉智源
服裝、化妝：Christian Dior