跟杜德偉（Alex）拍拖兩年、年紀相差廿一載的模特兒王珈晴（Bibe）情海翻波，昨日坦認是Alex主動提出分手，她說現在還揣摩分手原因，還兩度大嘆對這份情失望。對於有指Alex另結新歡跟同公司的師妹拍拖，Bibe說：「有乜關係我唔知。」
昨日，Bibe與尹蓁晞（Yumi）出席apm「達人夜書市及盤扣展」活動，Yumi雖以緊身tube top及短裙晒長腿纖腰，但Bibe以一襲心口開窿露出南北半球的裝束示人，成為全場焦點！
Bibe對分手傳聞直認不諱，更眼紅紅兼口震指是Alex面對面主動向她提出分手，她說：「為咗大家可以交差，我都要講一句，我對呢段感情好失望！（Alex有第三者？）唔想講太多嘞，我無智慧控制情緒，驚會出醜。分手理由係咩我仲揣摩緊，依家我要專注工作，下年我會出本散文圖集，呢個經驗（分手）令我有好多諗法，（爆料？）寫事實啫。（怕唔怕影響佢？）每個人成長要對做過嘅嘢負責，（佢對你唔住？）唔想講，佢咁大個人做咗嘅嘢唔怕被人知先繼續。」但她卻不肯明言對方是做了甚麼。
唔知佢同師妹關係
至於是否對分手感到深深不忿，Bibe表示不想多談，問到Alex是否賤男，她想了一會才說：「佢有對我好過，（仲好愛佢？）兩年來每日都好認真，無理由話唔愛就唔愛，（受之前Alex的召妓傳聞影響？）無影響我哋，係之前嘅事。」至於有傳跟師妹錢柏渝（原名為栢妍安）拍拖，Bibe則說：「我有睇新聞，話係佢師妹，當然有咩關係我唔知。」她否認分手是涉及錢銀，至於對方有否背叛她，她只說：「據我所知係無。」
Yumi想打botox
至於同場帶病出席活動的Yumi，表示近日瘦了五磅，連上圍也縮水，但最希望是瘦面，她說：「公司都話我塊面肥，我希望有人贊助打botox瘦面，好多後生女都會打，我唔怕有後遺症。」
文：名人組