不少在職媽咪對管教孩子都顯得束手無策，已「升呢」為少奶奶的歐陽妙芝（Christine），既有自己的事業，又將屋企打理得頭頭是道，對兩個囝囝更是呵護備至，他們不但精靈懂事，連肌膚也如剝殼雞蛋般滑不留手，似足媽咪咁靚！
對內 循循善誘
同時兼顧事業和家庭，令不少媽咪分身不暇，本來已忙於湊仔的Christine，早前與Gary Chung合作開設化妝及模特兒學校，致力開拓個人事業，但她沒有顧此失彼，反而跟孩子找到另一個「家」。「囝囝放學後，我通常會接佢哋嚟舖頭，一來親子之間可以多啲見面，二來可以趁機灌輸金錢概念畀佢哋；有時，佢哋會喺我忙於工作時扭計，我就會同佢哋講：工作嘅目的係希望一家人生活得好啲，畀佢哋知道要工作才有錢，世上唔係所有嘢都可以不勞而獲。」
Christine表示，兩個囝囝都好喜歡來店舖玩，因為可以看見很多新奇的東西，又可以與不同的人玩耍，「哥哥Achille同弟弟Atilla都好聽話，有時見到舖內嘅姐姐做緊清潔，仲會主動上前幫手呢！所以一班同事都好錫佢哋。」
朋友身份教仔
談到青少年濫藥等社會熱話，已為人母的Christine又有何見解呢？「老套啲講，仔女好與壞，真係在乎溝通與關懷。我好着重親子之間嘅溝通，每日都會抽時間同兩個仔傾心事，關心一下佢哋上課嘅情況。我認為時代不斷進步，教仔觀念也要因應社會步伐前進。爹哋經常擺出一副嚴父模樣，有時一早起床會捉住囝囝問：『早上要同人講乜嘢呀？』其實他只想囝囝開口跟他說早晨。我常提醒他，不要強迫兒子，會令他很反感，會不喜歡Daddy，所以我主張佢同仔仔做朋友，毋須特別擺出一副爹哋媽咪嘅威嚴，因為這樣只會令囝囝把想法埋藏心內。」
對外 御「膚」有術
內在美固然重要，外在美也不能忽視！
模特兒出身的Christine，對美有着一份堅持，不但努力Keep住自己狀態，對丈夫和兩個囝囝的肌膚護理也一絲不苟。「老公同囝囝嘅皮膚都好易敏感，轉季時會爆拆，甚至出紅疹，有段時間要定期睇醫生。後來化妝師Gary Chung建議我選用有機護膚品，自己做完白老鼠覺得Work，就畀囝囝用，家陣情況好咗好多。」
Christine笑言，自己不算最貪靚，丈夫方時俊比她有過之而無不及！「佢好貪靚，護膚品仲用得多過我，兩個囝囝就似足爹哋，有時大仔Achille見細佬搽護膚品，又爭住搽埋一份，依家佢哋每朝起身洗完面，都會自動自覺拎支Lotion嚟搽，仲話搽完會『靚靚喎』，有時都唔知好嬲定好笑。」
湯水潤膚
講到護膚，Christine又豈止一道板斧。除了選用有機護膚品，連食方面也要有機。「有機食物健康啲嘛！依家有咁多嘢驗出有問題，屋企有小朋友要更加注意，我對囝囝食嘅嘢、用嘅嘢都好小心選擇。天氣乾燥時，護膚方面會畀多兩錢肉緊，例如煲啲雪梨水畀丈夫同囝囝潤一潤，尤其是孻仔年紀仲細，更加要為佢打好底子。」為了屋企兩個心肝寶貝和丈夫，Christine真是費盡心機呢！
湊仔有苦有樂
身為兩子之母的Christine慨嘆湊仔過程有苦有樂。「最辛苦嘅階段，係Achille出世頭1年，嗰陣工人完全幫唔到手，每晚都係自己負責餵奶，幾乎全年都係自己一手一腳湊BB。雖然好辛苦，但見到BB快高長大，仲咁得意，付出多多都係值得！最記得有一次囝囝睇緊英語卡通片，突然指住黃色說Yellow，原來佢喺不知不覺間已吸收了很多英文詞彙，嗰一刻真係好Surprise！」
撰文：司徒德琳
攝影：郭凱敏
場地提供：美肌士多