繼《X-Men》、《變形金剛》後，另一套卡通改編真人電影《G.I.Joe》就快上映，記得這套當年在二台播的卡通，正邪人物夾埋近百個，個個都有唔同武器技能，打起上來十足老外版梁山泊。不過要搵個場景畀幾十隻人物對戰都唔易，所以廠商特別設計了一款3呎終極義勇群英基地，可容納多達80隻3.75吋Figure，大亂鬥話都冇咁易。

戰車機關重重

終極義勇群英基地是由裝甲運兵車改良而成，打開車廂及拉起升降台後便可見到各種場景設備，包括軍火庫、駕駛艙、炮台、休息室等，除了機槍、閘門等設施採用可動式設計，最搞笑是車頂可擺放乒乓球枱輕鬆一下。

雖然隨基地只附送一隻3.75吋夏威將軍（General Hawk），但同期備有數十款G.I.Joe人物模型，包括為人熟悉的大眼仔、雷影、毒蛇黨首領、男爵夫人等，更設有專為3.75吋人仔而設的戰機和戰車，看來想要齊一套，冇幾千元都唔落得樓。

3.75吋大眼仔和雷影兩位忍者死敵，除了刀劍還備有雷射槍、大炮等。售價：各$89.9

將軍與薛嘉麗乒乓大戰，細心的話可看到球拍有毒蛇黨標誌。

撰文：鍾鎮科　部分攝影：方偉堅

查詢電話：2302 1221