世上奇人奇事太多，搞到森美小儀日日「珍奇到O嘴」，而這股風氣近日更直捲NetBook界，本來平平無奇的10吋Atom細機，竟然由本地薑POSH進行大改造，除了加入火辣紋身、一按靚聲等奇趣功能，更以平到你唔信的二千多元推出巿場，夾埋真係要畀佢哋10個珍。

P6 $2,699再創新低

巿面美日韓台NetBook機款多到數唔晒，今次終於有本地薑POSH加入戰團，仲要以破新低價$2,699推出P6 POSH.BOOK，當然要支持一下。別以為平嘢冇好，P6用足10.2吋闊屏配合Atom 1.6GHz平台，跟機仲附送Windows XP和AS Anti-Virus防毒軟件，計落比其他10吋NetBook平幾百元，夠晒抵玩。

請畀珍：珍珍珍珍珍（10個珍滿分）

10吋機身採用常見的Atom加XP規格，叫價卻平到你唔信。售價：$2,699

正前方備有讀卡器和音源插頭，旁邊則有齊3個USB、VGA等輸出。

P7 10吋火辣紋身

以往NetBook大多採用黑白顏色機身，新款POSH.BOOK為求突出，不但大膽換上火紅、鮮黃等色調，P7更在10吋機背加上火辣辣紋身，帶出街肯定搶眼，可說為針對愛靚人士而設計。至於規格和效能則和P6差不多，內置Atom處理器、160GB硬碟，並預載Windows XP和常用軟件，配埋3 Cell鋰電出街大約可玩2~3小時左右。

請畀珍：珍珍珍珍珍珍

火紅撞紋身 P7	P7備有火紅、鮮黃和純黑色，不但背部加入火辣紋身，連機面都選用同一色調。售價：$2,699	開關按鈕移到機身旁邊，而且變成豆豉咁細粒，要搵一輪才可開機。

P8 MUSIUE MAD一按靚聲

P8 POSH.BOOK外表雖然平平無奇，但Zoom近卻發現零零舍舍多了一粒掣，按下去弱雞喇叭聲竟然變成Hi-Fi靚聲。原來POSH特別將MUSIUE MAD專利技術融入NetBook內，輕按快捷鍵即可強化音效輸出，改善喇叭仔向來「拆聲」的弱點，流動睇片自然更加傳神。代理仲話P8新機快將8月面世，預計售價在三千元左右，算是又一平價筍盤。

請畀珍：珍珍珍珍珍珍珍珍

一按大聲公 P8	P8雖然只得灰銀色機身，但內裏卻加入MUSIUE MAD專利技術，強化音效輸出。售價：待定	鍵盤下方多了一粒MUSIUE MAD按鍵，一按即提升音質，較適合外接Hi-Fi喇叭使用。

P22 3.5G大芒上網

對於白領一族而言，用10吋芒做文書工作似乎有點縮皮，所以POSH將P22屏幕擴闊至12.1吋，配合Atom處理器和250GB硬碟，用來上網、做簡報都綽綽有餘。最有趣是超薄機身整合埋HSDPA 3.5G網絡功能，就算搭車等人或戶外郊遊都可接收網絡資訊，變成24小時流動辦公室。

請畀珍：珍珍珍珍珍珍珍

大芒辦公室 P22	換成12.1吋大芒的P22，解像度亦提升至1,366×768，工作時就唔使矇起雙眼。售價：待定	超薄機身擴充插頭齊全之餘，仲加入3.5G SIM卡插槽，方便隨時隨地上網。
放大圖片

撰文、攝影：鍾鎮科

查詢電話：2191 7868