每次謝婷婷見報，總是談到阿哥謝霆鋒阿嫂張栢芝，又或回應感情問題，究竟她是怎樣的一個女子？原來婷婷是愛美一族，她說：「唔可以掂唔靚嘅衫，會打冷震。」自言活在幸福中，但對九十多歲的嫲嫲，卻是婷婷人生中的一個遺憾。
工作認真客戶讚好
婷婷未入行前，常被外間認為讀完番書回流的大小姐，不事生產，只懂扮靚或去夜店作樂。在嫩模一浪接一浪的模界中，婷婷也能成功分一杯羹，並且酬勞不菲，因為出席活動前，婷婷都會做足功課。如知道要介紹品牌的資料，會事先背熟講稿，難怪跟她合作過的客戶，也對她有讚無彈，就連跟她合作的拍檔，也指她認真得幾乎要求完美。
有得揀再做一家人
她從不理會外間的看法，除非父母或者朋友有意見，她才會care。對於香港傳媒的全天候追訪方式，婷婷坦言真的不大習慣，「我知大家都關心阿嫂（張栢芝）嘅嘢，但每次都問我，有啲問題我真係唔應該答，一來我要尊重佢，二來要尊重搞活動嘅客人。我喺加拿大長大，有我嘅私隱，我諗香港人覺得呢樣嘢唔係好重要。畀我再揀，都會揀番呢個屋企，雖然成日被人跟，但無嘢比呢個家庭更好。就算話我唔靚唔好，我唔會好嬲或走去自殺，因為我生命中有太多美好嘅嘢。」她續說：「我好愛阿嫂，大家一家人，唔使講咩嘢，每次見面都好開心，Lucas更加係大家嘅開心果。阿嫂係好媽媽，好錫我哋，我亦未見過一個女人咁愛一個男人，阿嫂咩都為哥哥諗先。好似哥哥鍾意打機，阿嫂見佢瞓咗，都會繼續幫佢打嚟儲分。」
演藝之家有辦佢睇
婷婷直言性格是話一就一，不可以有藉口，生在演藝之家，反而對自身前途見步行步。「由細到大，都唔會對呢行抱咩期望，如出碟等。對呢行我依家仲適應中，愈做愈有idea。我唔知家人係咪好影響我，老竇會教唔好執着，媽咪係everything out，就算要杯茶，糖同奶咩都要，哥哥向前望，好平淡過就得。」
談起加國的生活，想不到女人味十足的婷婷，曾是當地的網球精英之一。「以前打波時真係好男仔，曬到黑晒，打Tennis係一個訓練體能同智能嘅運動，輸贏都係睇自己個strategy（戰略）點樣。如果輸畀一個可以贏到嘅人，就要怪自己唔盡力。」
婷婷笑言自己外表女性化，但性格很男仔，如果當演員的話，真的有點頭痛。「我太honest，可能得一個表情，你叫我溫柔啲、女仔啲咪死！」自言不解女性溫柔，但要當模特兒，會否有點吊詭？
鍾意就買滿足自己
「我離開香港廿幾年，突然返嚟又唔知係咪長住。其實我好啱做PR，可能人哋以為我玩玩吓，加上返嚟時已經係十月，公司year end唔會請人。雖然爸爸有畀錢畀卡我，但我唔想成日問父母攞錢。與其都係出席活動，朋友話不如做埋可以搵吓錢。」
講到使錢，她說：「我仲未識使錢，要慢慢學，依家所賺嘅都會買番啲靚嘢，係對呢行嘅投資，再加上我要靚。幾時會停？我係唔係都要靚，所以會畀時間自己，儲吓錢先，然後再畀父母。」
靚衫，大概是令婷婷未懂「學使錢」的主因。「哈！最緊要型同靚！我好stubborn（頑固）㗎，好鍾意靚衫，見到唔靚嘅，一定唔可以掂，掂到會打冷震。」
「見到鍾意嘅，而又afford到，就一定買，得手後，就會同自己講下個月唔好再買，就算見到另一件鍾意，都會記得唔再買嘅承諾。」萬一喜歡鑽石？「好彩我仲未鍾意，太bling太sharp嘞。就算戴住成百五萬喺手又點，畀人斬手我唔會可憐你！」
保護新歡大談舊愛
談情，婷婷不愛公開，但說起前男友Drafus，竟然是……「人哋話女人嫁老公，一定會嫁番個似老竇。佢可能似老竇啩，最似係笑聲。佢好樂觀、係very good guy，無嘢會激嬲到佢，同老竇一樣都係貪靚。」
雖然跟Drafus已是過去式，現在式似乎是安志杰，但婷婷未有明言，只是甜笑的說向來不談感情事，那個笑容，應該就是答案吧。婷婷自言是一個易服侍的女友，「人哋拍拖會有紀念日，但依家大個咗，就無呢樣嘢，雖然聽到人哋會慶祝，會羨慕。」
忽略嫲嫲人生遺憾
婷婷的EQ尚算不錯，說話時咪咪嘴笑，有板有眼。自言一直感恩活在愛中的婷婷，談到人生的遺憾，語調立時不同，直率的說：「可唔可以最後先講？我驚我會忍唔住……」那個遺憾，她說：「我最後悔，係無好好照顧嫲嫲，喺加拿大時佢雖然住喺我隔籬，但我好少睇佢，（幾耐見佢一次？）唔講嘞，其實我知應該日日去睇，但都無，呢點，我好失敗。」
後記 行李箱的秘密
凡事要做到最好的婷婷，訪問當日，自己拉着一個巨大的黑色行李箱。箱中，全是化妝品、膠紙、髮夾等，甚至夾衫用的鐵夾也有兩大盒。
最令我好奇的是一個黑色笨重的資料夾。當化妝師來到，婷婷把資料夾打開，原來全是大大小小關於化妝髮型的剪報。婷婷指一指，化妝師點點頭，盡在不言中。我偷瞄那本資料夾，恕我見識少，訪問過不少女星，也未看過會有人像她這樣準備充足。聰明的她笑咪咪說：「行李箱同個clear folder唔好影嘞，唔需要咁刻意，你要交功課，寫出來就得。」
採訪：Winnie Choi
攝影：劉智源
服裝：Lane Crawford
場地：蘭桂坊酒店
化妝：Omix B
髮型：Ray Chan（Il Colpo）