兩個西部牛仔黐得咁埋，唔通係講《斷背山》？唔好誤會，佢哋兩位其實係新遊戲「Call of Juarez: Bound in Blood」嘅親兄弟主角Ray同Thomas。有玩過三年前第一集「Call of Juarez」，可能會對牛仔阿Ray有啲印象，佢之唔係上次兩位主角之一嘅牧師槍手，今勻就好似Laughing哥咁，搵佢擔正嘅新一集其實係前傳故事，睇番佢點化身成第一集嘅鐵血牧師！

加插牛仔指定動作

除咗開頭只可以用牛仔Ray外，其餘在每版開始之時，大家可以揀用牛仔Ray或牛仔Thomas完成任務，大佬Ray擅長近距離戰鬥，可以好似Mark哥以雙槍攻擊兼且用爆炸品，而細佬Thomas就擅長遠距離攻擊同埋放暗器，睇清楚任務簡介再揀用邊個角色就最慳水慳力。遊戲場景設計營造得好有氣氛，黃沙滾滾，而且仲加插咗好多牛仔劇集嘅指定動作，例如在酒吧講數、騎馬攀山越嶺、以馬車及獨木舟在西部馳騁，唔少得仲有牛仔快槍決鬥，鐘聲一響，要將角色嘅手移向手槍，然後鬥快瞄準同開槍，好考大家嘅協調性同反應。「Bound in Blood」最多支援12個玩家齊齊連線來個西部大決鬥，而且仲有好似土匪、快槍手、歹徒同礦工等13種職業畀大家揀，打得更過癮。

前傳故事搵寶藏

未玩過第一集會唔會追唔到古仔講咩呢？其實又唔怕，情況有啲似未睇過電視版，都可以暑假入戲院睇電影版Laughing哥一樣，橫豎新一集嘅角色都面目全非。第一集中牛仔Ray嘅拍檔係鬼鬼祟祟嘅Billy，而「Bound in Blood」所講係1864年美國南北戰爭時期，牛仔Ray未化身成牧師之前，孖住兄弟牛仔Thomas從南方軍叛變，在受各方圍剿下由喬治亞州一路殺到墨西哥境內嘅阿茲塔克遺迹，尋找傳說中嘅Juarez寶藏，當中嘅驚險程度更勝Laughing哥。

畫面暫停集體槍決

「Bound in Blood」繼續玩射擊，不過大家唔好預期會用到好科幻嘅武器，遊戲背景係19世紀60年代，武器就只有左輪、霰彈槍、大口徑榴彈炮或機關槍等，而且好多時要打幾槍先可以解決對手；但係武器Low Tech其實都幾有風味，好似中期有一版要喺岸邊嘅高處以大炮制止敵軍搶灘，殺傷力強，但瞄準難，而且Reload時間又長，挑戰性更高。

今集亦保留咗上集嘅「Concentration」系統，只要打中敵人，「Concentration」系數就會提升，當儲滿的話就可發動功能，畫面會暫時停止，大家可以在有限時間內以右Analog掣用準星掃射畫面上嘅所有敵人，當畫面回復時就會見到敵人被集體槍決，相當過癮，尤其被圍剿時就最有用。

遊戲資料

類　　型：射擊

開　　發：Techlab/Ubisoft

平　　台：Xbox 360、PS3

推出日期：6月30日

售　　價：$329

查詢電話：2725 3338

撰文：布偉倫