從某個角度看，香港的演員比荷里活的影星更加值得我們尊敬，因為他們一年365日、每日24小時都在「埋位」。
不只身為演員的何超儀、張兆輝要時刻埋位，就連他們的家爺仔乸、工人寵物都無一幸免，成為狗仔隊們最愛起用的「演員」。
沒有生活，何來演技？香港從來不乏醉心電影的演員，只是欠缺真正懂戲的觀眾。
孕育演技 談何容易
「香港是極惡之都，是個會逼你殺人的地方」，早在發生啜爆事件之前，倪震早已有上述感嘆。作為藝人，何超儀與張兆輝開工要面對導演的百般考驗，收工要承受狗仔隊的指指點點，能夠按捺得住不殺人，只將全副心機放到新片《殺人犯》的演出上，委實難能可貴。
何：如果我要演一個發生喺香港嘅故事，冇理由我唔使出去了解本地人究竟係點樣生活，但係我只能夠用最低調嘅方式去體驗，因為實在有太多人望住，令你唔能夠自在咁去生活。
張：我同意演員係需要有生活，先至能夠孕育出演技。
何：我甚至試過喬裝易服，特登走去逼地鐵，體驗點樣做一個香港人，但係咁樣睇番嚟嘅嘢，都唔夠真實。
張：講真依家嘅風氣，只能盡力而為，好多嘢唔係你想點就點，我夠想出年拍十部戲，但呢啲唔到你諗，喺能力範圍做到最好已經足夠。
投入角色 家人體諒
何：所以我一直抱住學習態度，既然唔能夠出去，就不斷睇戲，到接到角色，就諗番有邊啲戲可以參考。我都想透過接觸、了解去豐富角色，但依家變咗要用呢種方法，生活係重要，喺香港做artist實在太難。
張：好在屋企人都明白。
何：咁我嘅另一半都明白我，雖然有時我拍完戲仍然搣唔甩個角色，但屋企人會了解，唔會因為咁而唔開心。
張：呢啲要靠平時畀訊息屋企，要令佢哋知道我哋做嘢係點嘅，好似我未結婚嗰陣，已經同太太講，我入廠就覆唔到機，好亂，隨時三個鐘頭後至現身，預先溝通咗，佢就知乜事。
城城眼神 感染力強
何：我有同感，我拍《殺人犯》演郭富城個妹，全屋人陰沉，得我開朗，我覺得自己好格格不入，好在阿城唔使埋位都有同我傾偈，令我覺得自己冇咁odd。
張：阿城今次真係演得好落力，山坡嗰場戲，我同佢都好專注，大家都唔想miss咗對方咁有水準嘅演出，嗰場戲真係好難忘。
何：阿城今次啲眼神真係令我驚，尤其係對比番佢平時好樂天個樣，好多時我都被佢影響咗，不自覺咁陰沉埋一份，要導演即刻提番我個角色係要同阿城一家唔同。
張：我都好期待呢套戲，雖然我同你只得一場對手戲，但係同你相遇後，冇幾耐我就要死，點會唔深印象呀？
與導演擦出火花
《殺人犯》並非何超儀與張兆輝的首度合作，然而講到與《殺》片導演周顯揚，以及風格導演杜琪峯的合作點滴，兩人仍是有說不完的話題。
談談周顯揚－－
何：周導演搵我演呢個角色，毫無保留咁同我講想要啲乜，畀我了解佢嘅想法，令我拍得好舒服，加上佢係一個好dark嘅導演，而我亦好鍾意dark嘢，一拍即合。
張：我鍾意同啲發掘到我不為人知一面嘅導演合作，所以我好鍾意今次個角色，演一個我之前未演過嘅差人，加上拍攝現場個個都好投入去拍好齣戲，令我好enjoy。
說說杜琪峯－－
何：杜琪峯係唔話你知佢想要乜嘅導演，但我鍾意導演畀指引，我成日問住佢想我點演，佢都怕咗我，但佢都盡量講得少，令我覺得我好蠢。
張：好多人話杜琪峯鍾意鬧人，我要為佢講番句說話，真相係佢同工作人員講咗要求，而你做唔到佢先會出聲鬧，同佢拍戲都唔知幾舒服，現場又有BBQ，幾好呀！
文：陳專 攝：劉智源（張兆輝）／謝國華（何超儀）場地：蘭桂坊酒店＠九如坊
何超儀 髮型：Vic Kwan @ hair culture 化妝：ling chan @ ZING the makeup school