英國搖滾班霸Oasis結他手兼主腦Noel Gallagher，周二來港開騷前接受本報專訪，談及內地開騷被日封殺時難掩失望之情，而言辭一向辛辣的他還對其他音樂人極盡諷刺！
記：記者 N：Noel
記：中國騷被封殺有何感覺？
N：因為我哋十二年前喺西藏開過演唱會，所以依家內地開騷要被封殺。連我自己都唔記得有參加過，佢哋啲記性真好！其實我本身對政治冷感，當時只係好隨意咁上台。政治真奇怪，點解要同音樂扯上關係？實在可惜。
記：你上年演出時被狂迷推落台受傷，有冇留低陰影？
N：我哋依家唔會再容許fans喺台上睇騷。我個傷口有時仍然隱隱作痛，但至少比撞機好。
記：個人發展計劃怎樣？
N：六個月前我睇番自己未出版嘅歌曲，大概有三十首，我唔想好似2Pac咁，死咗先推出。
想為Coldplay監製
記：新碟有一半唔係由你創作，未來都會係咁？
N：你都可以話半隻碟係由我創作！冇錯，我唔認為全部用我嘅歌係啱，所以我們請監製決定。新碟中佢認為我有七首作品比人哋好，所以就用，但我有兩、三首落選嘅其實都比人哋嘅好，佢哋都承認，但都要配合大碟流暢度等原因，監製先決定唔用。我慶幸唔係由我嚟決定。Liam（弟弟、主音）寫啲歌好好，佢呢個人唯一可取嘅就係音樂，其他都係噩夢。
記：有冇諗過為其他音樂人做監製？
N：我想為Coldplay監製，我同佢哋主音Chris互相欣賞。我睇過好多次佢哋嘅騷，但或者可以換掉結他手。其實喺Oasis工作以外，我主要花嘅時間就喺家庭上面，我會扮怪獸同囝囝追逐。
記：有樂評人指Oasis風格從來冇變過，你點睇？
N：音樂係我嘅語言，點解要改變呢？我冇正式學過音樂，但我啲歌好精彩。
記：何解經常更換鼓手？
N：唔係由我決定，Chris（現任鼓手）喜歡留幾耐就留幾耐，我哋過去只炒過Tony，其他人都係自己走。
出碟時間愈來愈長
記：Oasis會因為甚麼原因解散？
N：我唔認為會解散，只係出新碟嘅時間會愈來愈長，因為年紀愈大精力愈少，Oasis至少可以再玩多十五年。
記：Kaiser Chiefs批評你冇將音樂當成藝術，你覺得點？
N：藝術係由專家定義再強迫人去接受。藝術館裏面有人喺熟雞蛋上放一堆大便，就話係藝術。Kaiser Chiefs呢類樂隊亂講嘢時，我總覺得有趣，因為佢哋根本冇人會理會，睇佢哋銷量就知道啦。
記：對備受批評嘅第三張大碟《Be Here Now》有咩睇法？
N：前兩張碟爆冷成功，當焦點集中喺我身上時，我覺得會唔舒服，一心想要變得商業化。我喺度假期間寫歌，結果花嘅精力不足，歌詞好差，歌曲又太長。
披頭四地位難代替
問Noel認為Oasis在歷來重要樂隊位置中排第幾位？他想也不想便答：「第七位，毫無疑問。」然後他選出了心目中的十大，依次分別是：披頭四、滾石、The Who、Sex Pistols、The Kinks、Stone Roses、Oasis、The Smiths、The Jam。「至於第十位，人人也可以是啦。」他說。
文：外娛組