阿里巴巴（09988）女員工被侵犯事件搞到滿城風雨，原來餘波未完！有傳騰訊控股（00700）一位實習生，直接發訊息畀主席馬化騰同總裁劉熾平，提出希望騰訊頒布拒絕陪酒條文，膽敢要老闆「務必回覆」。乜馬化騰個電話咁公開，連實習生都有？
呢位實習生期望公司可以杜絕「酒桌文化」，仲直接話：「你身為領導，必須為阿里此行為發聲，嚴令禁止此惡劣行為發生在我司！」好大嘅官威啊，大人！唔講我都差啲唔記得邊個係總裁，邊個係實習生添。隨後傳出，實習生表示將聯名提交一份倡議書，支持佢嘅人可以聯署，不過份文稿依家已經刪除咗。
劉熾平即晚就回覆咗實習生，大方地感謝佢嘅建議，又話要不斷強調騰訊對任何形式性騷擾的零容忍態度。他仲話，會將實習生嘅建議轉發畀HR（人事部），因為佢哋執行緊有關措施。
不過，成件事都係以截圖形式流出，更一度登上微博熱搜前3位。內媒引述，騰訊尚未對上述消息公開置評。
對於此事，有騰訊員工表示：「Who Are You？（你係邊位呀？）」。亦有網民認為，呢位實習生就係想紅。咁算唔算挖出另一個內地企業嘅文化陋習——「博上位」呢？
余絲韻