絲絲講場：網傳太太「訓斥」雷軍 馬雲嗌報警

之後有業內人士爆料，嗰位長氣投資者就係阿里巴巴（09988）創始人馬雲嘅夫人張瑛。不過，雷軍尋日就喺社交網站回應話喎，同張瑛係朋友，演講入面嘅投資話題「跟她沒關係」，網上傳言都係謠言。

小米股價曾惹投資者不滿

回想小米上市之時，可以話係無比風光，雖然估值一度被炒高去到1,000億美元，但上市之後股價「潛水」，離17蚊嘅招股價呢個家鄉長期都好遙遠。2019年9月初，小米跌到落8.28元嘅時候，雷軍都就快崩潰了。

雖然雷軍當時特別唔想見投資者，但有一個執意要見佢，一見之下，不得了。該投資者一坐低就毫不客氣咁話：「你們怎麼讓我賠了這麼多錢？我真的不知道你們怎麼幹的。」雷軍話，當時佢恤衫都濕晒。至於係邊個搞到佢恤衫都濕，雷軍就冇講。

其實，雷軍在2020年12月小米11發布會上坦言，小米股價長達兩年低於發行價，「比較丟人」。不過，隨着小米進軍高端市場，股價就一路上漲，更加一度升穿34蚊，實現上市當日話畀投資者賺一倍嘅宣言。即使噚日收市輾轉碌返落26.85元，都總算叫做吐氣揚眉。

雖然雷軍話明同馬雲太太係Friend，唔關佢事，但之後都有多事嘅內地傳媒就此向馬雲求證，對方亦回應話：我哋即刻報案！不過，仍然有大批食花生嘅網民關注，有人仲好抵死咁話：「次日，馬雲訓斥雷軍兩小時，並且要求公開闢謠！」

余絲韻