致富智庫:拚搏為「錢」途 慎防谷爆

香港人生活忙碌急速,返工「朝9晚5」基本上係奢望,超時工作到天光更加唔係新鮮事,尤其目前疫情肆虐,工作之餘更要留意新聞。其實,你係咪已經被份工「透支」到盡?

打工仔被透支10大徵兆

外國傳媒引述一份大學研究報告指出,48%打工仔喺過去5年曾因工作感到焦慮;31%覺得好難喺工作同家庭中搵到平衡;53%指工作令佢哋覺得過分疲倦。有人力資源報告更指,被份工「谷爆」,往往就係辭工最主要原因。

點樣先知係被「谷爆」?最極端而又真實嘅例子就係有人喺工作期間攰到猝死;又或者因過分疲倦而突然休克,令臉部伏低時被整傷,又或硬物入眼,最後需要縫針,呢啲都係真實例子。

上述咁極端,當然冇咁容易出現;不過一旦被「谷爆」嘅情況發生,就無可挽回。所以,以下同大家講講比較輕微,但係已經構成警號嘅10大徵狀。細心數數,你自己中咗幾多項?如果有,你份工可能難撈到爆:

1.健康出現問題:健康唔只係講身體表面,內心都計!如果積勞成疾,令你背痛、沮喪、心臟病、過胖,或者時不時出現小病,就要睇睇份工係咪仍適合你!中國人有云「病由心生」,癌症喺中醫角度又叫「鬱積症」,千祈唔好將抑鬱變成疾病!

2.認知困難:有研究發現,壓力會令人嘅記憶力、決策能力、情感控制、集中力出現問題。當你發覺突然間犯下愚蠢錯誤、唔記得重要事、突然情緒失控、決策力變差,就係被「谷爆」迹象。

3.人際關係轉差:壓力會影響一個人嘅生活,尤其係人際關係,就算你喺工作上頂得住壓力,返到屋企都可能變咗「另一個人」,反而令家庭生活唔好過。當你發現經常有無謂爭吵,就要小心。

4.帶工作回家:工作歸工作,放工返屋企後就係私人時間,如果仍要工作,就證明到咗「工作狂」階段,係嚴重被「谷爆」信號。

5.疲倦到想死:當你有一日覺得就算夜晚瞓得好好,但朝早連起身都有難度、一日到黑咖啡不離身,又或者喺工作時難以清醒同難集中精神,就要警覺已被「谷爆」,生命無價,小心小心。

6.負面情緒主導:當你有日突然變得憤世嫉俗,經常覺得全世界欠咗你,甚至覺得自己人工好低,上司全部庸碌無能,所有嘢都非常負面,就係被「谷爆」。

7.滿足感下降:好多時推動努力工作嘅原動力就係「滿足感」,一旦滿足感下降,對你嘅工作一定有影響,呢樣亦係你對現有工作壓力爆煲嘅重要信號。

8.突然洩氣:若果有一日突然將工作當成「度蜜月」,即係突然Hea做,主動性盡失,根本就唔係原本「陽光」嘅你,呢樣都係被份工「谷爆」嘅特徵,就好似一個洩氣嘅氣球。

9.表現不進反退:你要經常回顧自己嘅表現,例如一個月前係點樣?6個月前呢?一年前呢?如果覺得自己嘅表現不進反退,就要留心喇,份工或已經將你「透支」,你要諗諗呢份工仲啱唔啱你做。

10.自控能力轉弱:學美國佬名曲《The Greatest Love of All》話齋,人生最偉大嘅愛就係愛自己,當有日你發覺自我控制能力變差,甚至向平日覺得邪惡嘅「誘惑」低頭,例如食煙、酗酒、蒲吧等,就要小心喇。

上述徵兆,你如果中咗大部分,或10樣徵兆都中晒,除咗辭工外,就只有一個解決辦法,就係一定要做到「公還公,私還私」,放工、放假堅決唔好諗工作!記住,唔好同自己講做唔到,你唔想辭工,一旦被份工「谷爆」,工作效率大跌,最終可能都係「被炒魷魚」,咁不如預早做好「防爆措施」。

學識6招避免捱到病

正所謂「你有壓力,我都有壓力……」中咗幾多個徵兆唔緊要,最緊要係知道點解決。以下有6個參考辦法:

1.公餘絕緣:仲記唔記得「絕緣體」呢個名詞?謹記,一定要識得公餘時間「絕緣」,唔能夠一星期7日24小時都無間斷只有工作同睡眠。當然,現今社會難撈,周末放假要完全唔理工作或者唔可行,但一定要實施喺特定時間內唔理電郵、WhatsApp、WeChat等,只陪家人。初時可能好難,但一定要持之以恒先能見效。

2.留意身體警號:特別要留意自己係咪經常頭痛、胃痛、頸痛。好多時,身體上任何痛楚都係壓力同緊張所造成,唔能夠輕視,謹記身體會提醒你係咪已被工作「透支」。中醫有云:「怒傷肝、喜傷心、思傷脾、憂傷肺、恐傷腎。」莫名嘅痛楚往往係大病嘅先兆。命仔緊要,工作次之!

3.定時放鬆:有別於第一點,請你每日工作期間最少抽15至30分鐘「放鬆一下」;食吓朱古力,飲少啲咖啡,鬆弛神經,做一啲你覺得可以減壓嘅事。唔好睇少呢10幾分鐘,因為「健康才是財富的火車頭」。

4.勿服安眠藥:唔好以為食安眠藥可以解決睡眠問題,呢樣嘢同醉酒差唔多,長期依靠藥物並唔係睡眠,會損害你嘅記憶力,形成惡性循環,加速衰老。你一定要令大腦自然地作息,唔好連大腦都被份工「谷爆」。

5.分配時間:有時候並非份工本身「谷爆」你,而係自己安排不當,搞到成日好似得個「忙」字,之後不斷呻「好忙」。嘗試安靜落嚟諗諗係咪有更好嘅辦法,或搵前輩、朋友、親人等,總之搵一啲你信任嘅人傾傾,利用人哋嘅經驗嚟解決問題,唔好自己「鑽牛角尖」。

6.搵「加油站」:記住每個人都有壓力,唔只得你有,唔好浪費你嘅親情、人脈。搵一個朋友圈,形成「心靈加油站」,得閒聚會高談闊論,甚至一齊去吓旅行,盡情將煩惱掃走。金錢身外物,親情同情誼先係無價。

好嘞,或者你一路睇,就一路鬧呢6個辦法只係「阿媽係女人」,明白你「好躁」,但咁樣好大機會已證明份工「谷爆」咗你,記住你只有兩個選擇:要份工定要健康?

上班族須放大假11個警號

香港人生活忙碌,除咗係全世界工時最長嘅地方外,股市、樓市上落亦影響港人情緒,尤其係跌市更容易令人精神緊張,目前加上疫情重創經濟,可謂雪上加霜。不過,再忙都必須要抖抖氣,據外國研究發現,一個人如果操勞過度,會較常人高33%機會引致中風、高13%機會引致心臟病。所以適當「充電」係必須嘅,以下係綜合媒體研究得出11個必須「放大假」抖一抖嘅徵狀,不妨參考一下:

1.樣子與身份證差不多:呢樣唔係港人獨有,幾乎全世界人嘅身份證相都係影得好醜嘅,所以極少人會攞身份證個樣嚟炫耀。所以話,若果你驚見自己個樣似身份證入面嘅你,請快快放大假。

2.睡眠不好:如果發現自己難以入睡,或凌晨3點會自動驚醒,即反映你已經過度操勞兼壓力大,就代表是時候休息幾日。

3.錯失很多私人活動:得閒睇睇WhatsApp,如果你發現自己不斷推卻聚會、家庭飯局、同朋友少聯繫等,請放大假聚聚,工作唔係第一,情誼先係無價。

4.經常在工作上犯錯:如果你發現自己近期喺工作上犯錯嘅次數比以往多,就要放大假充電,因為已經透支喇。

5.對工作不再充滿熱誠:如果你最討厭星期一,覺得最好唔使返工,就係放大假嘅時候。當然,每個人都會話任何時候都討厭星期一,問自己真心嘅嗰句啦。

6.失去幽默感:若你覺得自己唔太容易笑,或難以喺工作上搵到「開心位」,咁就要放大假抖抖。

7.簡單工作突然覺得很難:一啲平日你駕輕就熟嘅工序突然之間覺得好難做。人非機械,休息同輕鬆一下啦!

8.全副生命被工作包圍:當你覺得工作太多,已到咗一個忘記自我嘅嚴重階段,例如阿媽叫飲湯都嫌煩嘅時候,就要放低工作,專心抖抖。

9.只是想起工作:與以上嘅不同,如果你唔使返工,但同朋友聚會時都諗起工作,無論係講同事或老細是非,定係其他工作相關嘅事,只要係不斷「呻」嘅話,都應該抖抖,因公餘唔應該講工作。

10.以不良嗜好解決壓力:明明不煙不酒,但突然好想破戒,或者明明鍾意運動,但突然唔想做,呢樣亦係需要放大假嘅迹象。

11.發夢也想着工作:當你有一日夢醒都深刻記得夢中係工作嘅話,請即刻計劃放大假,因為你潛意識已變成「工作狂」!