絲絲講場：麗人麗妝老闆娘尋夫 市值唔見23億

男主角無正面回應

點知老公就搵唔到，但就拖累麗人麗妝連續兩日閃跌，股價急瀉近兩成。到星期四，夫人又發文，仲影咗封畀律師事務所嘅文件，似乎係想威脅離婚。股民今鋪就撐佢，麗人麗妝周四、周五都錄得升幅，不過都補唔番之前兩日跌勢。仲有內地股民叫呢隻麗人麗妝做「渣男概念股」添！

事件引起上交所關注，其官網披露，上交所已向麗人麗妝發出監管工作函，就相關媒體報道事項明確監管要求，涉及對象為上市公司、董事、控股股東及實際控制人。

不過，風波男主角黃韜一路都冇正面回應，只係話就快出年報，現時好難回應呢個問題。仲話依家自己處於輿論弱勢，大家睇到嘅唔係真相。「說實話，你也看到他們的水軍團隊威力很大，我們也搞不過他們。」黃韜又話，佢唔相信輿論能夠干預司法喎。

點都好啦，絲絲就覺得家庭矛盾應該閂埋門和平解決，唔應該由股民承擔。不過，原來要為風波埋單嘅，仲有阿里巴巴（09988）。資料顯示，阿里網絡係麗人麗妝第二大股東，持股比例為17.59%。今勻阿里真係躺着也中槍！

余絲韻