絲絲講場：積金局主席MPF回報佔餘額50% 有咩秘訣?
積金局主席黃友嘉（David）上任6年，即將退下火線，卸任前繼續大讚強積金制度可靠性甚高，穩健程度非常適合香港人，更罕有透露自己嘅強積金投資回報佔整體餘額高達50%，唔怪得自己都話好滿意啦！對於市場有聲音話，應該容許打工仔提早提取強積金，以解燃眉之急，佢就耍手擰頭，話有其他方法可以幫到市民喎。
雖則強積金制度已面世20年，但David話要去到完全成熟，至少需要35至40年。據積金局嘅數據，咁多年嚟淨投資回報達36%，而佢個人嘅回報水平就遠超過呢粒數喇。佢又話強積金嘅特色係固定供款，可以長時間唔使大動作改變投資配置，叫打工仔實在唔需要花太多時間管理強積金。
強調唔係益咗基金佬
問到佢有咩投資準則，同埋點樣配置，佢就好謙虛咁話，冇一種投資標準適合晒所有人，最緊要睇長期價值，對於自己投資配置秘訣，佢就比較口密。至於會唔會喺基金加入虛擬資產，佢就冇正面回應，只係話會不斷拓展唔同嘅投資領域。
David過去一般都好少講咁多個人嘢，今次佢透露，當年後生喺美國生活，做嘅第一筆投資就係可扣稅自願性供款嘅互惠基金，當時自己未夠30歲，依家回望過去，覺得係好合宜嘅抉擇，又唔需要承受股票市場嘅高風險，強調強積金制度唔係益咗基金佬。
至於任內最自豪嘅工作，佢就好謙虛話每一樣都係成個團隊一齊砌出嚟，特別點名有「懶人基金」之稱嘅預設投資策略（DIS），可以幫到冇時間打理強積金嘅打工仔，又設收費上限，同時落實成立積金易平台等，提高強積金制度透明度。
余絲韻