絲絲講場：滙控今年「加假」益全球員工
疫情之下各位打工仔都唔易做，滙豐控股（00005）行政總裁祈耀年透過電郵通知全球員工，話理解員工一邊在家工作（WFH），一邊要照顧屋企同小朋友，都好唔容易，員工今年可「加假」一日。雖則疫情揮之不去，佢就話對今年前景仍然樂觀，喺下個月公布年度業績時，會講多少少銀行嚟緊幾年嘅定位同埋發展策略。
體諒WFH兼湊仔頗吃力
他喺封電郵大打溫情牌，話過去一年各國面對疫情封鎖，同時又要處理家庭健康問題，都咪話唔吃力，自己都好明白喺屋企同時要返工同湊仔嘅情況。但佢相信，疫苗獲批加上未來得到廣泛應用，今年下半年情況會有所好轉，仲叫大家畀多少少耐性，會返到正常生活模式。
考慮到員工舊年付出唔少，所有同事今年可獲額外假期。又話客戶數量嘅增長及客戶滿意度提高，證明咗員工過去嘅努力喎。
查實喺舊年11月，滙豐向香港員工宣布，容許員工每星期最多有4日在家工作，而每星期最少兩日在家工作嘅員工，可向銀行申請一次過2,500蚊津貼去買設備，滙豐喺員工幅利上面做得都唔少嘅。
不過，全球息口低企加上滙豐夾喺中美角力之間，過去一年條路唔易行。雖則今次大手「派假」，但上禮拜先傳出向基層員工（第6至8級）發內部通知，將今年花紅上限降低22%，又向各部門主管落指令，基層員工今年薪酬總額預算增長僅得約2%。
余絲韻