絲絲講場：內地年輕人爭送外賣工廠大鑊？
依家科技一日千里，作為世界工廠嘅中國都不斷搞創新科技！絲絲諗起前幾年內地年輕人入職「血汗工廠」，壓力爆煲自殺收場！如今內地電商行業高速發展，可能令呢種悲劇減少發生。
唔單只咁，內地工種急速改變，依家唔少年輕人寧願入行做外賣仔，都唔願再喺工廠內苦戰，所以啲廠家不時呻請人艱難，無後生仔入職，咁內地製造業點算好？
送餐商機達6536億
近年內地外賣平台如美團點評同餓了麼等急速興起，原來截至上年，內地餐飲外賣規模已達到6,536億元人仔，外賣仔數目超過700萬人，其中美團請咗400萬個車手，20至40歲嘅佔咗近84%；餓了麼就請咗300萬個車手，90後佔咗47%，有15%車手係由製造業工人轉型。
絲絲有時都會同啲廠商吹吓水，佢哋都呻近呢十年好難請工人，幾年前要同零售商鬥請人，近年就要同外賣平台爭人。上一代人覺得離鄉背井打工，就係走入工廠。呢一代人要有更多自由時間，就係去城市送外賣。根據資料，依家大部分工廠工人嘅工資係4,000至7,000蚊人仔，包食包住，輪休制居多。但加入外賣行業，月薪7,000蚊人仔以上，兼可以自己掌控到時間，賺多賺少由自己決定。
其實上年牛津經濟研究院都發表咗一份《機器人如何改變世界》嘅報告，話機械人會不斷取代工人，預測到咗二○三○年，全球製造業就業職位會減少2,000萬。
世界每日在變，昔日貌美嘅絲絲如今都增添咗幾分成熟韻味，過往對科技抗拒嘅絲絲，依家都不時網購靚衫、同外國好友Zoom吓，當然都會用外賣App order美食啦！
余絲韻