絲絲講場：耀才氹員工盈喜後速派花紅

新冠肺炎疫情肆虐，企業為咗節省開支都傾向保留現金，不過都有逆市奇葩嘅，本地證券行耀才證券（01428）成功喺「疫」市突圍而出，早前發咗盈喜，話二○/二一年度首三個月純利按年大升53%至1.53億元。

經理級別高達五千

一向豪氣開嘅集團主席葉茂林自然開心啦，宣布豪派七位數字特別花紅畀員工，即係合計至少百萬元呀！

佢話集團業績好，全靠員工喺「疫」市中迎難而上，搏到盡，要鼓勵同多謝員工，仲講明「有福同享，多勞多得」。

呢筆花紅人人有份、永不落空，無論係前線定後勤員工都有。據講經理級別或以上每人有5,000元，而其他職級每人有2,500元。

收完政府派錢，又收埋老闆嘅花紅，絲絲認為最開心嘅莫過於係一班員工啦，睇吓佢哋個個，真係隔住個口罩都見到笑容！

余絲韻