Market Insight：恒指恐隨時退守二萬七

究竟今次疫情會唔會變成當年「沙士」咁嚴重，老古冇水晶球，但可借鑑○三年經驗。當年三月正是沙士肆虐高峰期，恒指翌月跌至8,300點水平見底，但當疫情逐步受控時已開始回升，六月中經已挑戰1萬點關口，全年更累升35%至12,500點水平收市。

講到底，港股除咗疫情利淡之外，亦要面對上月至今連升3,000點嘅回調壓力，疫情或者只係股市整固藉口。未來若然連250日線都失守，相信去年八月至今嘅上升通道底部27,000點將會係下一個關鍵位。

個股方面，美團點評（03690）自去年次季開始業績由虧轉盈，第二、第三季合共賺逾21億元人民幣，反映客戶對平台應用嘅依賴度，對商業客戶嘅吸引力大增，加上嚟緊五月後有機會納入恒指成分股，值博率唔錯。

美團要先睇50天線承接

走勢上，美團過去一年股價持續大漲小回，昨一度急跌至98.65元，收報102.6元。短線先觀望能否收復50日線103.3元，若重返其上，有望回穩整固，否則有機會再試90元水平承接。有貨想加注或者冇貨想買貨，可先觀察50日線承接再作部署。