絲絲講場：股神失威 巴郡股價遠輸大市
講到投資，連股神巴菲特都失威！話說佢嘅投資旗艦巴郡（Berkshire Hathaway Inc.）股價舊年僅累升約11%，對比標指全年升近29%，巴郡唔單止跑輸美股大市，輸嘅幅度更加係十年最大！
4年乏「大象級」收購
睇番巴郡過去四年都冇巴菲特口中嘅「大象級」收購，令到公司截至舊年第三季尾坐擁破紀錄1,280億美元（約9,984億港元）現金，相當於公司市值四分之一！美國現時咁低息，揸Cash收息唔賺得幾多。
Apple持股市值狂飆
股神好想將啲錢用於收購，但係美股估值咁高，啲嘢貴晒，佢要忍手。就舊年十一月，巴郡開價約50億美元，想收購美國資訊科技設備分銷商Tech Data，但被另一競購者出更高價橫刀奪愛。就算係股神一向心儀嘅珠寶品牌Tiffany（蒂芙尼），原來亦邀請過佢加入競購，只係佢老人家婉拒。
即使巴菲特舊年老貓燒鬚，但佢投資眼光獨到，至今仍獲好多投資者認同。巴郡自一六年起買入蘋果公司（Apple Inc.）股票，至舊年第三季持有近2.49億股，呢批股票市值高達731億美元。睇番舊年Apple股價全年累升超過86%，係道指表現最好嘅成分股，足證股神仍寶刀未老。
除Apple外，巴郡舊年第三季尾五大持倉嘅股份係美國銀行、可口可樂、富國銀行、美國運通。值得留意，巴郡舊年亦首次買入亞馬遜（Amazon）！
余絲韻