絲絲講場：「Disney+」訂戶熱捧惹埋黑客

據外媒話，好多Disney+用家帳戶被黑客入侵並放上網賣，Dark Web熱賣緊嘅帳戶數量以千計！留意番，淨係賣緊嘅都以千計，咁Hack咗尚未「放盤」嘅都唔知有幾多嘞！

賣盜用帳戶 平月費逾半

聽聞，Disney+上周二喺美加等地正式上線唔夠幾粒鐘，黑客已經喺網上掟啲Hack咗嘅用家帳戶出嚟，開頭都仲有啲係免費畀人任執嘅，不過依家已經係3蚊美元（約23.4港元）起跳，叫價高嘅就去到11美元，比起Disney+最基本月費6.99美元平一截。

不過，唔好以為咁係執平嘢，查實就等如偷！將心比己，諗吓被人Hack嗰個幾慘情。有用家個Account用唔夠幾個鐘就被人盜用，即使多次改密碼改聯繫電郵地址，鬥智鬥力鬥快，都只係僅僅夠時間畀佢取消訂閱！佢算好彩，有啲用戶連密碼都被人改埋，失去使用權之餘，錢要照畀！

既然迪士尼都否認存在安全漏洞，作為用家咁點算？絲絲諗來諗去得八個字：自求多福、各安天命。

余絲韻