國際貨幣基金組織下調亞洲今明兩年經濟增長預測，加上美國企業業務好壞參半，港股亦快將進入業績期，市場轉趨觀望，恒指昨日即市級級落後反彈乏力，最終跌219點報26,566點，國指則跌75點報10,451點，最慘係主板成交僅681億元，睇怕個市又開始牛牛皮皮。
若然睇埋A股走勢及近期升得唔錯的板塊都係冇乜力，其實就發覺現階段港股都唔係咁好炒。滬綜指早前受中美首階段貿易協議消息而反彈，但於十月十四日高見3,026點就冇力再上，三千點關唔夠兩日就得而復失，昨日報2,941點，睇怕貿易協議未有進一步消息前都係唔上唔落居多。
本來新經濟股近期都唔錯，主要炒「同股不同權」公司納入港股通。但內地計劃修訂「網絡保護」條例，加強管制未成年入之網絡遊戲時間，騰訊（00700）咁大隻單日都要跌2.3%報320元，而其他股份如金軟（03888）、IGG（00799）、網龍（00777）及雷蛇（01337）都分別跌1至2%不等，可見氣氛轉弱。
不過，大行摩根大通發表報告指，騰訊過去三個月股價走勢弱，相信是市場關注公司個人電腦遊戲、廣告業務放緩，但預期今年下半年及二○二○年，旗下手遊前景將較今年上半年為佳，料主要受惠《和平精英》等熱門遊戲帶來的收益。該行並對其第三季營運數據作出預測，估計非通用會計準則下，每股盈利2.8元人民幣，較市場同業高8%，維持其未來十二個月之「增持」評級，目標價維持450元。
部署方面，大行唔係睇得太差，不過騰訊仲有三個星期就公布季度業績，股價此前能否守穩320元此下半年關鍵位就係重點，而中美貿易戰發展及氣氛難以預視，故只宜按圖行事，若股價短期仍能守穩320元水平，已持貨者不用太擔心；反之，一旦確認破位而落，咁就要考慮減磅，甚至全面止蝕了！
古勝