孖妹S檔案:港股危與機 全方位拆局

孖妹自認夠多正能量,不時同大家講關關難過關關過。不過,最近見好多公司因經營困難而裁員或倒閉,頓時愁眉深鎖,好擔心失業率上升,手停口停嘅家庭經濟支柱點算。而股市向來係經濟嘅晴雨表,我哋搵嚟分析員預測後市及解構經濟,盡早畀大家一個心理準備。

等跌落22000至撈貨

羅:交銀香港首席經濟及策略師 羅家聰

羅:港股無乜危,亦無乜機,似雞肋。若你係價值投資者,我建議等多陣,因急入市可能要捱價,料恒指今年內有機會跌到22,000點,屆時才撈貨。分析港股市盈率,你會發現其長線呈現跌勢,且受經濟或股市結構影響,反映市盈率無一個常數平均數,目前水平唔算平,未夠抵買。

美科技股蓄勢待發

Kitty:咩都唔做會老人癡呆。

羅:點會?同打工心態一樣,返咗成個禮拜工,周末要喺屋企Hea吓。但若你係短線炒家,或者可博一博依家入市,上望27,000點。至於買衍生產品嘅投資者,要衡量風險,因港股波幅大,期權價會貴咗。

彩兒:到時買咩股份好?

羅:美國科技股!因科技就係下個爆發點,投資者宜捉緊人工智能及機械化等大趨勢,發掘潛力股。而唔一定係發明者先有價值,科技應用都可以做得好好。另預計美股同港股短線同步,所以都可以睇實港股見22,000點時追入美股。若同我一樣睇好美國科技股,就可以買多啲,唔使分散,以免分薄回報。

Kitty:恒指22,000點就係底?

羅:我會話22,000點係第一隻熊腳,當失業率呢個滯後指標都急升,即確認衰退。若其後再觸發樓價大跌,就會出現第二隻熊腳,恒指或插至16,000點。呢次熊市唔似過往股災,一兩年就完,亦唔似○○年股災,一下子跌幾千點。去年一月恒指升至33,484點歷史高位後反覆下跌至今,都未跌到三分之一,算耐。

港金融中心地位危

藺:智易東方證券行政總裁 藺常念

藺:港股超危,料恒指會跌至22,000點水平!我從未試過咁悲觀!好慘!香港社會矛盾睇唔到答案,最大風險係香港失去國際金融中心地位,而我覺得係會發生,香港會被慢慢掏空,到時我哋都無工做。我都諗緊不如返加拿大住好喇。

旅業寒冬 累收租股

Kitty:你要離開香港?我哋會好唔捨得你。

藺:我都唔想。依家我正不斷沽藍籌股,應該會沽到恒指下試22,000點先收手。其中收息股都唔好要,你見以前一向收租穩定嘅商場,依家受旅遊業寒冬影響,生意急劇下跌,其股價點會好?

彩兒:我有幾位朋友揸住滙豐控股(00005)嗌晒救命。係咪一股不留最精明?

藺:港股下行壓力大,唯獨內地消費股,例如啤酒、黃金股及蒙牛乳業(02319)仍然有啲希望。不過,中國經濟放緩,不宜買入A股指數。

後市未明朗 宜「忍」與「等」

郭:帝鋒證券及資產管理行政總裁 郭思治

郭:港股勢危。旅遊業受創,香港經濟步入寒冬,港股難獨善其身,應會一浪低於一浪。目前恒指自七月29,070點回落,已進入中期跌浪,料到九月中或十月初先會抖抖氣,但後市仍未明朗。依家最好係忍同等,若真係想細注入市都仲得,大注就唔好喇,宜揸一半Cash。

金價或衝上1920

彩兒:買債買金又得唔得?

郭:經濟下行壓力大,不明朗因素湧現,企業多新債冚舊債,都可能會出現違約。至於黃金,我預計佢會先整固再炒上,並且挑戰每安士1,920美元。因為自○八年起,美歐日等央行紛紛印鈔提振經濟,而佢哋陸續增持黃金以抵禦貨幣貶值,料黃金需求會持續向上,刺激金價炒上。

郭:我建議買入實金或招金礦業(01818),料後者技術上相對硬淨,會持續跑贏大市。

憧憬中美貿戰好消息

梁:海通國際證券財富管理投資策略執行董事 梁冠業

梁:港股危中有機。呢兩個月,港股係慘,但香港整體經濟未算大鑊。

Kitty:未到大鑊,我怕好多人已心臟病發。

梁:目前市場已熟習美國總統特朗普對中美貿易戰態度反覆,甚或開始麻木。而佢嘅招數都不無多樣,多次逼美企撤出中國,但言過其實;又或當美國經濟差時,放軟態度等。我覺得貿戰壞消息已出盡,依家只係等好消息。無可能出現美國贏而中國輸,另佢唔會想攬炒,所以料雙方有偈傾,唔覺會因此觸發港股大跌。

至於香港社會動盪,幾時完結係關鍵。若短期內可解決,對香港實體經濟無大影響,因情況就似○八年金融海嘯或○三年沙士,香港經濟短時間沉寂,但會快復原。若長期解決唔到,對經濟有大影響。而目前市況係未反映社會動盪出現大鑊嘢。

彩兒:聽你口脗,港股有轉機。

梁:無錯。港股估值平,且業績表現都合乎預期,投資者可增持內需股,以及醫藥、教育及內房股等。中國今年下半年經濟料會勝上半年,因過去經濟刺激政策開始有作用。但穩陣起見,同時買入黃金及日圓避險,對沖風險都好。最壞情況,港股會跌至22,000點;目前25,000點水平已幾抵撈。

國壽騰訊盈利無礙

王:駿達證券創辦人兼集團行政總裁 王海翔

王:大家唔使太悲觀,有危就有機。我料恒指喺逾25,000點見底,未來會升至三萬點,建議依家用三成資本趁低吸納藍籌股或交易所買賣基金,如盈富基金(02800)、騰訊控股(00700)、中國人壽(02628)、友邦保險(01299)及香港交易所(00388)。

Kitty:若社會衝突持續,香港經濟受損,到時港股咪一鑊熟?

王:又未必。部分股票如國壽及騰訊,其主要業務唔喺香港,故料社會紛爭唔會影響其盈利,就算投資氣氛差咗,甚或香港失去國際金融中心地位,股價仍有上升動力。再者,單從投資角度,若未來有嚴重事件發生,投資者可考慮機械式加碼入藍籌股。

鎊或反彈 不妨落注

王:另外七成資本可買英鎊、澳元及黃金等。面對英國無協議脫歐風險,英鎊續弱,曾跌穿兩年低位,但有危自有機,英鎊或觸底反彈呢。我有朋友隔山買牛,買入海外物業博升值。查實未嘗不可,但要對當地樓市有敏銳觸覺,適時買賣先得。

361度抵買 防守力強

余:余礎安會計師事務所主席 余礎安

余:我睇淡後市,但港股危中有機,可嚴選個股入市。我首選361度(01361)及統一企業中國(00220)。361度無涉及政治風險,且估值低,市盈率約九倍,遠低於市盈率逾36倍、同為體育用品股嘅安踏體育(02020);且股息吸引,其中期股息每股8.2仙及特別息每股1.1仙,防守力強。再者,其中期業績勝預期,係當頭起嘅細隻股。投資者可喺其股價逾1.54元追入,若其後確認企穩1.5元,更可加注。

統一企業中國中期業績勝同行康師傅控股(00322)及中國旺旺(00151)。因原材料價格下降、中國政府減稅降費之優惠政策以及公司持續優化其產品結構,令其毛利率上升。

彩兒:原來龍頭唔一定最有升值潛力。

余:除咗個股,我仲睇好投資評級嘅企業永續債券,其息率走勢緊貼美國十年期債息,且價格穩定,違約風險低。至於黃金,目前價格貴咗啲,且無息收,唔使急住買。

彩兒、Kitty