絲絲講場：「非洲手機王」快變億萬富豪

傳音上科創板 估值300億

據招股書披露，傳音計劃發行不少於8,000萬股，最少融資30億元（人民幣‧下同）。內地券商預測，傳音市值達300億元。照咁計，傳音創始人竺兆江因為持有傳音15.39%股份，佢個人身家將會升至46億元。招股書同時睇到，由一六到一八年，傳音年年都賺錢，分別賺8,628萬元、6.77億元同6.57億元。

話說，傳音舊年喺非洲手機市場以市佔率近一半，連續兩年蟬聯非洲整體手機市場榜首。即使用全球手機銷量比較，舊年傳音手機出貨量1.24億部，市佔7.04%，位列三星、蘋果公司（Apple Inc.）同華為後，位居第四。

至於傳音手機點解咁成功？除咗係靠旗下3大手機品牌TECNO、itel同Infinix，售價由15至200美元夠平外，竺兆江仲透露，傳音成功在於本地化和差異化。首先，傳音開發出非洲本土語言手機輸入法，手機超長待機21天、專為膚色較深嘅非洲用戶特製嘅美顏自拍功能以至隨手機附送頭戴式大耳筒，皆因非洲人全都能歌善舞。

此外，非洲唔同電訊商之間嘅通話費好貴，多帶備幾張卡可以慳番唔少錢，於是傳音率先喺非洲推出雙卡雙待機以至四卡四待手機，俘虜晒非洲用戶嘅心！

余絲韻