絲絲講場:股神教路做商界奇才

每年咁多人報讀MBA(工商管理),唔通讀MBA就可以成為商界奇才?當然無咁易啦!不過有股神巴菲特指點迷津,各位讀緊MBA嘅大學生距離成功就行近一大步啦!

學生哥究竟要點樣先至可以脫穎而出呢?股神強調,IQ(智商)高固然好,但係絕對唔能夠令人特別出眾。

首要正直聰明誠實

佢仲教學生,要寫低一啲好嘅性格特質,將佢哋變成習慣,呢個先係成功嘅關鍵。只有誠實、正直嘅品格同高尚嘅道德情操,先可以令人成功地闖入專業嘅世界。

如果想成為僱主想聘請嘅人,就要留意以下幾點。股神請人嘅準則並唔單止跟商界標準,如睇成績同學位,反而更注重個人質素。

股神引述奧馬哈同鄉著名企業家Pete Kiewit嘅請人心得,最緊要睇三樣嘢,就係正直、聰明同充滿能量。股神補充,如果請番嚟嘅人唔正直,得智慧同能量反而會害死佢。

余絲韻