絲絲講場：AMD一姐打入最佳CEO榜
美國財經周刊《巴隆氏》剛剛公布嘅「2019全球30位最佳CEO」中，除咗股神巴菲特、亞馬遜貝索斯、迪士尼艾格，微軟納德拉、Facebook朱克伯格，以至騰訊控股（00700）馬化騰等等大家熟悉嘅CEO外，掌舵半導體公司AMD嘅蘇姿豐（Lisa）亦首次上榜，更成為《巴隆氏》網上版及實體雜誌嘅頭版重點報道人物。
蘇姿豐愛蒲實驗室
《巴隆氏》認為，自一四年Lisa姐擔任CEO後，AMD嘅市場地位有明顯嘅提升，並對美國晶片業巨頭Intel構成重大威脅，而佢精通技術範疇，亦都帶挈咗公司業務，令到AMD股價勁升。正如佢回答《巴隆氏》時笑言：「可能因為我鍾意去實驗室蒲，同啲工程師一齊感受同了解乜嘢係真正嘅挑戰，先至有今日咁好嘅成績。」
對於Lisa姐領導下嘅AMD，《巴隆氏》預計該公司將喺未來幾年獲得可觀嘅收入回報添。事實上，從財經數據嚟睇，AMD過去兩年營收均實現超過20%增長，去年就達到3.37億美元。
帶挈公司股價升8倍
喺Lisa姐擔任CEO嘅過去五年間，AMD股價累升800%，去年更加係標普500指數表現No.1嘅股票。另外，截至上周五止，公司股價今年已累升逾64%。有晒業績及股價支持，Lisa姐都可謂名副其實嘅晶片女王！
相反，喺GPU晶片領域上，同為競爭對手嘅NVIDIA（英偉達）CEO黃仁勳今年就被《巴隆氏》喺最佳CEO榜單上剔除，因為公司嘅Turing晶片喺遊戲業務表現差。
余絲韻