Market Insight：港股正步入動盪時期

股市的資金取向大概已反映了市場預期。港股失守28,000點及牛熊分界線之後冇回頭，昨日（周一）低位見過27,699點，雖然論指數唔算跌太多，但睇見隻散戶愛股——騰訊控股（00700），就同小股災冇分別，季績公布後翌日（即上周四）股價上過高位376元就快速掉頭，上周五尾市沽盤如潮，已心知不妙，果然昨日繼續湧現沽壓，失守350元，考驗340元水平支持，且成交唔細，逾92億元。

撈騰訊隨時浪費彈藥

老古的睇法依然係，騰訊仲未撈得住，大家千萬要忍手，免得浪費銀彈。事關今次班芬佬係決心減磅騰訊套現，有指係因為美國上市的同業巨擘短期在大股東減持下有大量平貨，班芬佬要套現去接平貨；亦有指班外資睇淡中國科網股前景，所以加大減持力度。無論如何，結果都係一個，就係短期沽壓難消。在下睇今浪股王可能要回試300至320元區域，至少喺月底前都當睇佢唔到，唔好心急溝貨。

吼港鐵可博財息兼收

呢期口淡淡，除咗逢反彈沽，冇咩好做。昨日指數唔係跌得太多，純粹因為有錢頂住個人民幣。事實上，班大戶亦樂意托一托個指數，方便減持藍籌股之餘，可同時部署期指淡倉。當完成減持藍籌股的動作，相信又到期指淡倉收割的時候。呢場貿易戰最終有幾慘烈冇人知，但必然會對全球經濟造成傷害，仍然熱衷於購買資產，包括物業的投資者，必須認清大局，注意風險，謹記沒有投資產品係保證永遠只升不跌的，包括港樓，切莫對號入座。

市場風險胃納持續收縮，避險股就不斷迎來資金流入。公用類股短期仲係相對穩陣之選。中華煤氣（00003）見新高19.3元，逆市升逾1%；房託基金亦反覆向好，領展房產基金（00823）股價再創新高見97.6元、置富產業信託（00778）見新高10.88元。

見到隻港鐵公司（00066）都連升咗三個交易日，公司派發末期息將於五月二十四日除淨，反正呢期個市興玩避險股，就順水推舟，小注博吓財息兼收。

至於內地晶片股，昨逆市做好，如中芯國際（00981），皆因市場憧憬日後電訊商會多用國產晶片。問題係，若然內地晶片業係爭氣，唔使搞到今日咁糟糕的地步。所以，只能以短線投機看待板塊異動，千祈咪認真話要長線持有！

古勝