Market Insight:騰訊勢弱無謂博反彈

港股上周又唔見六百點,失守250日線。老實講,呢個俗稱「牛熊分界線」的位,目前而言唔係咩大支持位。上周五離岸人民幣去到6.94樓上,A股好似散晒,拖累港股低收。一日內地唔出招維穩,A股會繼續拖住港股級級落,一旦人民幣穿七算,個市點都要再跌多浸。唔排除進入五月下旬,「窮」至極,大家都係要繫緊安全帶。

中美互撼 經濟有排煩

貿易戰方面,傳來中國取消逾三千噸美國豬肉訂單。本來美國供應商都以為可以靠中國豬瘟疫情賺一大筆,點知依家中美貿易談判搞到一鑊粥,真係見財化水。其實,中國唔向美國進口豬肉,可以向其他來源入口,如巴西,但美國總統特朗普的行為就變相傷咗美國豬農的荷包,打擊選票。有美國零售商更揚言,一旦中美繼續互相加徵關稅,美國商品將現加價潮,打擊美國消費市道。到底利弊之間,特朗普將如何拿捏,一念之差,足以影響未來十年的全球經濟格局。

中國方面,豬疫情蔓延之下,食品價格將在未來數月繼續拉升通脹,令政府在考慮降法或減息方面多了一重顧慮。百業艱難,就業市場終歸會受到影響,到底除了減稅降費,尚有甚麼法寶可以穩定社會經濟,老古同大家一樣都好想知,只是心底裏卻也明白政策空間愈來愈小,持貨信心下滑是必然結果。

房託基金避險受追捧

仍留喺魚缸的資金,無不以避險股為先,上周房託基金表現跑贏大市,其中置富產業信託(00778)基金單位價格創歷史新高,領展房產基金(00823)亦一度見過新高96.8元。分享唔到呢啲升幅,都唔緊要,最重要係知道,當連呢啲避險股都展開跌浪的時候,就係決心全身撤退,躲進深山避世之時!

本來諗住季績可以帶來一點支持,可惜騰訊控股(00700)在季績公布後升勢短暫,上周五派息除淨股價仲要質到落355元,收息唔夠蝕價,捧場客自然心傷。

原來內地最大的搜索入門網企首季度財報遜預期,上市以來首個季度錄得虧損,搜索業務高管辭任。同業巨企表現如是不濟,整個板塊都唔會安寧。難怪上周股王啲沽盤不絕,看來是有資金減持板塊比重。

講番股王騰訊,走勢上,上周四、五呢兩支陰燭,可以確認已失守去年末季以來的升軌支持,下一個較大的支持區在330至340元水平,即係短期可能會繼續玩潛水。既然走勢唔就,都冇得對着幹,畢竟呢個市氣氛真係好差,散戶咪心急溝貨,有反彈就減減磅,無謂逆勢而行。

古勝