絲絲講場：光大水務偷步敲鑼股價唔響
中國綜合水環境解決方案供應商光大水務（01857）昨首日掛牌，作為光大集團一員，當然唔少得光大系嘅高級管理層！要數最搶鏡，就非光大集團董事長李曉鵬莫屬。
首掛跌11% 每手蝕$340
事關李總居然「偷步」敲鑼，嚇到在場嘉賓心都離一離，大家以為錯過咗歷史性一刻。李曉鵬就話唔驚，敲鑼只係一刻，重要嘅係公司以後發展咁話！結果連埋正式嗰下，足足響起兩次鑼聲。
不過，睇嚟敲兩次鑼都敲唔起股價。光大水務開市報2.99元，與招股價相同，雖然一度升上3元，但隨即「潛水」，最終收市報2.65元，較招股價低11.3%，投資者每手1,000股帳面蝕340元。
對於首掛表現失色，光大水務執行董事兼總裁安雪松就講到明，股價跌係公司預料之內，事關上市前嗰一晚，美股都跌，公司跟大市都好正常。
安雪松仲話，公司業務主要喺內地，香港地理上更接近熟悉公司嘅投資者，相信喺新加坡同香港雙重上市，可以有更強互補性，仲有利公司集資添！佢期望每年新增項目唔會少過雙位數，又會積極探討海外發展，如東南亞及「一帶一路」沿線地區，當然會優先考慮母企光大國際（00257）項目所在地，因為可以同母企產生更大協同效應。
李曉鵬仲希望集團嘅環保業務可以為社會、世界有更好貢獻，為地球出一分力咁話！光大國際董事長蔡允革與光大水務兼光大綠色環保（01257）董事長王天義聽到都點晒頭，睇嚟收到Order嘞！
余絲韻