Market Insight：零售板塊寒冬未過

雖然美國總統特朗普發難話要加中國商品關稅，但中國表現保持理性，中方亦證實代表團如期啟程赴美談判，算是暫時穩定局面。之不過，一日未見兩國元首動筆簽約，一日都會有變數。美國賭得太大，中國亦並非毫無退席的勇氣，一旦玩「一拍兩散」，嗰一刻金融市場先至真係大大鑊！

要做股壇長青，唔係志在可贏幾多，而係要計住可輸幾多。睇恒指現時走勢，29,500點樓上已形成重大阻力區，短線反彈後，若再掉頭跌穿28,800點水平，建議執行紀律減磅，而牛熊分界線28,000點係最後防守線，一旦穿埋，可離場提早抖暑，等末季再見機行事。

魚缸頻現「邪」象

昨日魚缸唔少股民都在談「秋官」同「五窮月」雙效應非同小可，賭錢的人特別信「邪」！其實，升到上三萬點，好友不斷話恒指會向去年歷史新高33,484點進發，可是從資金面和企業盈利前景來看，港股都似乎未具破頂條件，那三萬點係階段性終點抑或起點，實在值得深思。

唔知大家記唔記得，四月中旬以後，大行們排隊出報告唱好樓市。不過大家睇睇五大地產股的股價走勢圖，多半是紛紛見頂回落。事實上，最近香港公布的經濟數據都差到冇朋友，加上股市動盪，中美貿易矛盾待解，企業盈利前景未明，樓價要繼續擺脫基本因素反覆尋頂，只怕調整壓力就會愈大，對於地產股，股市投資者用腳投票套現為先，以致出現大行唱好，股價照跌的現象。查實，有番咁上吓股齡的，都應該見識過，每次喺市況處轉折之際，大行不約而同唱淡或唱好，多半可視為反指標，此又一魚缸「邪」象，信不信由你！

講番香港經濟，首季GDP創近十年新低，零售數字亦每況愈下，剛剛有港九黃金地段商場收租王出嚟話，今年以來香港零售表現比舊年弱好多。顯見，香港零售市道差，無論政府數字同商界的看法都好一致。如是者，對投資者有咩啟示？第一，零售股唔掂得，如金飾股六福集團（00590）、周生生（00116）、周大福（01929）；化妝品股如莎莎國際（00178）、卓悅（00653）等，都係唔好貪平就去撈貨。

本地收租股宜減磅

第二，就係收租股，尤其係從事商場物業租賃業務者，未來估值下調壓力漸現，唔想長期作戰就最好逢反彈減磅。第三，比較中長期的影響，就當然係就業市場承壓，皆因零售業景氣差，企業請少咗人，開少咗舖，最終都會影響就業市場，間接又會反映在消費信心上。

港股在三萬點水平，估值並未反映經濟下行風險，投資組合應該攻、守、定退，大家要打醒十二分精神，做好風險管理。

古勝