絲絲講場：兌吧轉場敲鑼一樣熱鬧
內地移動互聯網公司兌吧集團（01753）尋日（七日）掛牌敲鑼被迫轉場，咩事咁陰功豬？上市儀式通常都喺香港交易所（00388）大堂搞，但兌吧首掛同一年一度LME（倫敦金屬交易所）亞洲年會撞期，咁大件事就焗住讓個大堂畀LME。
陳總杭州孖員工睇直播
兌吧惟有轉去港交所8樓會議敲鑼，點知喺上市儀式，竟然唔見27歲嘅兌吧董事長、首席執行官兼執行董事陳曉亮！佢係咪因為轉場嬲咗無嚟？其實新股上市改地點敲鑼都唔係第一次，同埋陳總無咁小氣，佢要喺杭州參加科技活動所以缺席啫。兌吧董事會秘書曼曼爆料，陳總特登叫同事全程直播，佢仲同公司團隊計埋成600幾人齊齊喺杭州睇！
呢邊上市敲鑼由曼曼同有份投資兌吧嘅TPG投資中國區管理合夥人孫強做代表，氣氛一樣熱鬧！
兌吧股價尋日表現反覆，一開市就較招股價跌5%，之後升過上6.39元，點知收市跌番，淨係升咗0.16%，報6.01元。結果散戶每手賺得4蚊，係咪因為無喺大堂敲鑼所以氣勢無咁勁？
余絲韻