絲絲講場：陳民亮「找數」雷蛇出多士爐
三年前嘅愚人節，電競產品商雷蛇（01337）曾經講笑，話要推出雷蛇多士爐（Razer Toaster），估唔到三年後嘅今日，佢哋將呢個玩笑變成現實！？
雷蛇CEO陳民亮話，自從一開呢個玩笑，每次喺個人Facebook發布文章嗰陣，都會有粉絲問佢幾時有雷蛇多士爐。
忠粉百萬Like撐搞新嘢
最終佢提出，只要粉絲喺一個雷蛇Facebook活動頁面上，畀夠100萬個Like（當中若粉絲紋上Razer紋身並上載照片，可以當10萬個Like），佢就會同團隊將雷蛇多士爐付諸實行。
唔好睇小粉絲嘅力量，佢哋最終累積超過4.5萬個Like，同時仲有12位粉絲Show出紋身照片，超額完成100萬個Like嘅目標！最重要嘅係陳民亮真係「找數」，答應會成立專屬團隊，設計同生產雷蛇多士爐，更會定期向粉絲更新產品進度添。
講開又講，絲絲就八到，原來雷蛇同多士爐嘅淵源要追溯到一三年，嗰陣有粉絲喺雷蛇嘅Facebook Group活動頁面開立「Give us the Razer Toaster」討論話題，希望公司生產一個多士爐。
其實除咗多士爐，陳民亮去年亦曾經承諾，如果個人Facebook頁面獲得超過1萬個Like，就會推出同樣係由粉絲構想嘅雷蛇夾公仔機。
睇嚟大家以後想雷蛇生產啲乜，要識得點做啦！
余絲韻