絲絲講場：維珍妮「Bra」閉技術戴上眼

電子產品大家都用過，但有冇諗過生產電子產品會用到整Bra嘅技術？內衣生產商維珍妮（02199）主席洪游奕自爆，同社交媒體Facebook旗下Oculus VR合作，幫手生產VR產品嘅某啲部件，而相關部件仲應用咗集團新研發嘅生產內衣新技術，等用家戴住VR產品嘅時候更貼同更舒服咁話！

佢仲話，遲吓會同微軟（Microsoft）展開合作，同樣係應用新布料同結合新技術，生產鍵盤配件。不過就強調，該業務仲喺起步階段，佔比亦相對較少。依家集團每年都會投放3%銷售額喺產品同技術研發上！

除咗電子產品，洪游奕仲好鍾意足球。無論幾忙都好，只要利物浦有球賽，佢都會睇！唔知第時洪生係咪會戴住用佢哋內衣技術生產嘅VR設備，嚟睇利物浦比賽呢？

余絲韻