絲絲講場：高效領導必做8件事

1【先自問有咩必須做】

留意，問嘅唔係「自己想做咩」。就如通用電氣前CEO Jack Welch於一九八一年接掌公司時，冇進行自己最想嘅海外擴張，反而大Cut公司唔賺錢嘅業務，佢裁員裁到有「Neutron Jack」稱號，即「猶如中子彈般殺人」，結果佢在任廿年間，公司利潤勁升七倍幾！

2【決策符合公司利益】

領導者落決策時要考慮邊個先？股東？股價？員工？高效領導者嘅答案只有一個——對公司有利。事關唔符合公司利益嘅決策，最終將損害所有利益相關者。

3【行動計劃要有時限】

講得幾好聽，冇行動就係廢。所以，好嘅領導者一定係實幹型，會制訂有時限行動計劃，幾多個月內要做到啲咩。仲必會於項目中期及終期各檢視一次，因應情況修改。

4【設定項目責任承擔】

跟住就要任命執行嘅負責人，若6至9個月仍達唔到預期成果，唔會只賴負責嘅下屬不力，反會問責自己是否任命人事不當，立即重新搵人去執行。當然，亦絕不容許無所作為嘅員工佔據重要崗位阻住地球轉。

5【發放訊息易明平等】

高效領導者發放訊息，會確保人家聽得明收得到，唔係大聲講咗就算，仲必須同等重視上、下及同級嘅訊息需求，即是唔會以扣起消息自抬身價。

6【專注機會而非問題】

解決問題只能防止損失；着眼機會先能創造成果。

7【開會明確唔嘥時間】

開會傾工作要事先確立開會為咩，並僅限於該事項，做主持嘅最差係當成自己演講。

8【由「我們」角度出發】

高效管理者應深知，最終承擔責任嘅實係自己，冇得分畀人孭；佢哋之所以具某啲職權，完全出於組織嘅信任，所以思考同講話時，要習慣用「我哋」而非「我」。Drucker話，呢點一定要嚴格遵守！

余絲韻