絲絲講場：婚嫁股喜「雙」逢 盲年照上市

嘉藝大派朱古力玫瑰

尋日係洋溢住浪漫氣氛嘅情人節，嘉藝好醒目揀喺十四號公布招股詳情，配合晒公司主題。主席莊碩仲非常貼心，到場記者們每人都獲得一支朱古力玫瑰，睇得、食得、仲可以呃Like！不過最吸引絲絲目光嘅，莫過於七位一字排開嘅靚女PR（公關）！

咦！點解相入面有9位靚女？原來當中有兩位係專業模特兒。不過，着起靚裙，各位PR都非常省鏡，企埋一齊都無咩分別，大家又估唔估到邊兩位先係Model？

嘉藝主要市場係歐美地區，不過莊生話中國仍然係全球伴娘裙、婚紗及特別場合服最大出口國，唔擔心中美貿易戰會對公司造成影響，仲話嘉藝係好多客人嘅單一供應商，即使第時加關稅都可以完全轉嫁，所以都無考慮要搬廠。佢又同大家分享點樣成功抓緊客人嘅心，就係陪同客戶一齊設計，配合晒對方嘅生產規格，自然製作出嚟嘅裙都啱晒心水。

招股每手5090元入場

嘉藝計劃發行1.3億股股份，招股期至二十日止結束，廿八日上市，集資最多1.638億元，每手4,000股入場費約5,090元。公司將引入三位個人投資者作基礎投資者，合共認購3,500萬元等值股份。

余絲韻