踏入豬年，古勝祝廣大讀者今年股場賺個盆滿缽滿，贏到開巷！睇番周一狗年最後半個交易日，恒指升59報27,990點，主板成交410億元。全個狗年計數，恒指累瀉3,125點，國指則累跌1,499點。咁豬年來臨，又會唔會有新景象呢？
從基本面睇，自一九年初開始，市場先後炒作人行放水、美國減慢甚至停止加息步代，最新炒作主題就輪到春節行情及憧憬中美貿易談判有新轉機等。而喺放假期間，美股表現亦唔差，雖則今日港股會唔會來個「開門紅」就未知，惟短期延續升勢機會確實唔細。
部署方面，由於中美貿易關係是影響短期投資氣氛的最重要因素，而美國總統「侵侵」喜怒無常，故往後發展仍有變數，所以策略上宜以穩中求勝為主。
首先，受惠於人行近期放水的板塊，相信非中資金融股如內銀股及內險股莫屬；至於中資券商股，同樣受惠A股氣氛回暖。睇番滬綜指自今年一月四日低見2,440點後就開始反覆向上，近期雖然在2,600點水平略有阻力，但不排除整固一輪後可再上，故預期上述三個板塊短線繼續「行運」機會唔細。
操作上繼續貫徹唔強唔買策略，內銀吼建行（00939）及工行（01398）；內險則留意近期走勢不俗的中國太平（00966）及中國財險（02328）；中資券商股則可揀中金公司（03908）、中信證券（06030）及HTSC（06886）。
其次，受惠於美息預期走向影響，一眾公用股表現唔錯，煤氣（00003）及中電（00002）近月反覆向上，主因聯儲局隨時停止加息，兩隻公用股吸引力自然相應上升，故值得逢低吸納睇中線。
另外，領展（00823）從去年十一月在70元樓下，升至本月再創歷史新高。考慮到短期累積升幅不少，加上9日RSI維持在超買區內，有心買貨者宜候80至81元水平才吸納。
古勝